نېتن ياهو په غزه کې د جګړې ختمولو د حماس غوښتنه رد کړې

د اسرايل وزيراعظم بين يامين نېتن ياهو د اتوار/ يکشنبې په ورځ د حماس لخوا په غزه کې د جګړې ختمولو وړانديز رد کړی دی، ياده جګړه په څلورمه مياشت دوام لري.
نېتن ياهو ويلي، "زمونږ د يرغمل شوو د خوشي کولو په بدل کې، حماس د جګړې ختمولو، د غزې څخه زمونږ د ځواکونو ويستلو، د ټولو قاتلانو او جنسي تيريو کوونکو خوشي کولو غوښتنه کړې، او د حماس داسې پرېښودو يې ويلي. خو زه د حماس په وړاندې تسليمدل په کلکه ردوم".
حماس د اتوار په ورځ، په اسرايل د اووم اکتوبر د خپل بريد دفاع کړې خو غلطي یې منلې او په غزه د اسرايلي يرغل ختمولو غوښتنه یې کړې ده.
حماس په اسرايل د بريد په اړه لومړي بيان کې دغه حملې ته د فلسطين څخه د اسرايلي قبضې ختمولو او بنديانو خوندي کولو دپاره ضروري اقدام ويلي وو.
د نومبر په مياشت کې د امریکې، قطر او مصر په درېمګړيتوب خبرو کې د حماس د ولقې نه د 240 يرغمل شوو د ډلې څخه د 100 نه زيات هغه اسرايلي يرغمل شوي کسان خوشي شوي، کوم چې حماس د اووم اکتوبر د حملې په مهال يرغمل کړي وو، د دغو کسانو په بدل کې اسرايل د جېلونو څخه 240 فلسطيني بنديان ازاد کړي وو.
له دغې وروسته په نېتن ياهو په اسرايل کې دننه او د نړيوالو مشرانو لخوا فشار دی چې نور 136 يرغمل راخوشي شي څوک چې اوس هم يرغمل دي، خو ويل کيږي په دغو کسانو کې د 20 نه زيات مړه يا وژل شوي دي.
د امريکې د صدر جوبايډن نه بغېر ځينې نړیوال مشرانو په جګړه کې د سمدستي جنګ بندۍ غوښتنه کوي.
په اووم اکتوبر په اسرايل د حماس په حمله کې 1200 کسان وژل شوي وو. او د حماس د کنټرول لاندې د صحت وزارت وايي، د جګړې د پېل راهسې په غزه کې د 25,000 نه زيات کسان وژل شو ي چې وسله وال او ملکي خلک پکې شامل دي.
د اسرايل وزیراعظم نېتن ياهو په وروستيو کې د فلسطيني رياست ضد کلک دريځ خپل کړی چې منځنی ختيځ باثباته شي او د اسرايل حماس جګړه نورې سيمې ته غځېدو مخنيوی وشي.
بايډن او نور امریکايي چارواکي د فلسطيني رياست غوښتنه کوي.
نېتن ياهو ویلي،"د دريایې اردن په لويدیځ کې په ټولو علاقو به د اسرايل په بشپړ امنیت جوړ جاړی ونه کړم".
د امریکې صدر جوبايډن د جمعې په ورځ د نېتن ياهو سره د يو خپلواک فلسطيني رياست د جوړولو په ممکنه حل لاره خبرې کړي چې پکې غېر پوځي حکومت هم شامل وي.
نېتن ياهو ویلي، " د کورني او نړيوال فشار" سره مخ دی چې د فلسطين د رياست په اړه خپل دریځ بدل کړي.
خو نوموړي زياته کړې، "زما ټينګار دی کوم څه چې د کلونو راهسې د فلسطيني رياست جوړولو مخه نيولې، چې شتون به یې د اسرايل دپاره خطره وي".
د برتانیې د دفاع وزیر ګرانټ شېپس د اتوار/ يکشنبې په ورځ سکايي نيوز سره په خبرو کې ویلي، د اسرايل او حماس د جګړې ختمولو او فلسطيني رياست په اړه د نېتن ياهو څرګندونې "مايوسه" کوونکې دي.
جوبايډن د نېتن ياهو سره د جمعې د ورځې د خبرو په اړه ویلي، "د دوه رياستي حل څو ډولونه دي"، د نوموړي نه پوښتنه شوې د نېتن یاهو سره دوه ریاستي حل ناممکن دی؟، هغه ويلي، "نه داسې نه ده".
د امریکې صدر د جمعې په ورځ د اسرايل د وزيراعظم سره نزدې يوه میاشت وروسته خبرې کړي دي.
د نېتن ياهو دفتر ویلي، "د صدر بایډن سره په خبرو کې وزيراعظم نېتن ياهو خپله پاليسي تکرار کړې چې د حماس ختمولو وروسته، بايد غزه د اسرايل په کنټرول کې وي چې غزه بيا د اسرايل دپاره ګواښ جوړ نه شي، د فلسطين خپلواکي د دغه غوښتنې سره په تضاد کې ده".
( د دې خبر معلومات د اې پي، اې اېف پي او رويټرز خبري ادارو څخه اخستل شوي).