د پاکستان او هند ځواکونو په سرحدي پوله په يو بل باندې د ډزو تورونه پورې کړي ، او راپورونه وايي په پوله د ډزو په نتيجه کې دواړو خواؤ ته لږ تر لږه نهه کسان وژل شوي او يو شمېر نور ژوبل شوي دي .
د پاکستان د سرکاري ميډيا ترمخه د سيالکوټ په ورکنگ باؤنډرې يا پوله باندې نن د گل په ورځ سحر د هندي ځواکونو په ډزو کې د دوه ماشومانو او يوې زنانه په گډون څلور کسان وژل شوي ، او درې نور ژوبل شوي دي .
د پوځ لخوا جاري شوي يو بيان کې وئيل شوي پاکستاني ځواکونو د هندي ځواکونو د ډزو په کلکه ځواب کړی دی .
د پاکستان پوځ وئيلي ، هندي ځواکونو د نکيال نه علاوه ، تته پاني او کوټ کيرتا سېکټر باندې هم ډزې کړي دي .
بل لور ته د هند د سرحدي ځواکونو په وينا د هند د انتظام لاندې کشمېر کې په لائن اف کنټرول پاکستاني ځواکونو د پولې پورې مخ ته ناتاره ډزې کړي ، چې پکې لږ تر لږه پينځه کسان وژل شوي او ۲۹ نور ژوبل شوي دي .
د هندي چارواکو په وينا د پاکستان لخوا په ارنيه سېکټر باندې ډزې او گوله باري شوې ده .
له دې وړاندې هم د دواړو خواؤ نه په يو بل د ډزبندۍ د خلاف ورزۍ تورونه لگېدلي دي . او په تېرو څو مياشتو کې د دواړو ملکونو په گډه پوله ورکنگ باؤنډرۍ او لائن اف کنټرول باندې د ډزو په پېښو کې سېواوالی مخې ته راغلی دی .
