پاکستاني صحافیانو د نهې/سې شنبې په ورځ په ټول ملک کې احتجاجي مظاهرې وکړې او د ریاست د ځواکمنو امنیتي ادارو لخوا پر رسنیو زیاتیدونکی سېنسرشېپ، له دندې څخه د خبریالانو گوښه کول او اوزگاره کول، او همدا راز د خپلو تنخواگانو ځنډېدل یې وغندل.
دا مظاهرې د "یوم سیاه" یا تورې ورځې په نامه، د پاکستان په بېلابېلو ښارونو کې وشوې، او مخکښه ډله یې، د پاکستان د صحافیانو وفاقي انجمن و. یاد انجمن وایي خبریالان، چې په هیواد کې له ډېر سخت پړاو سره مخ شوي دي، فیصله کړې ده چې د "بې سابقه سېنسرشېپ" سره مبارزه وکړي.
د پاکستان د صحافیانو د وفاقي انجمن مشر، افضل بټ د نهې/سې شنبې په ورځ وویل چې دا مظاهرې "لا د یو تحریک آغاز" دی.
جرنلسټان او د مطبوعاتو د آزادۍ کارکنان وایي چې د پاکستان پوځ پر رسنیو یا میډیا فشار راوړي څو د ریاست خلاف خبرو مخه ونیسي. دا په داسې حال کې ده چې د عمران خان حکومت خپل د اعلاناتو بجټ کموي او په دې سره، د خصوصي ورځپاڼو او ټي وي سټېشنونو د آمدن لویه برخه له منځه ځي.
په تیرو څو میاشتو کې، څو سوه صحافیان له دندو شړل شوي دي، ځکه د میډیا ادارو د حکومتي اعلانونو د کمیدو له وجهې، د صحافیانو تنخوا گانې نشوای ورکولای.
د سې شنبې ورځې په مظاهرو کې، صحافیانو تورې پټې پر مټو تړلې وې، تورې جنډې یې هم له ځانه سره لېږدولې، او د سېنسرشېپ، د خبریالانو د معیشتي ستونزو، او د اظهار رایې د قوانینو د خلاف ورزۍ ضد یې شعارونه اوچت کړي و.
د پاکستان د صحافیانو وفاقي انجمن مشر، افضل بټ وایي چې د ریاست چارواکي "په دې ورځو کې آن د رسنیو د رپوټونو شیبه په شیبه جزییات څاري، او دا دستور ورکوي چې څوک دې د چاپي او یا الکټرانیکي میډیا مخکښه کسان وي."
د پاکستان د حکومت له اړخه، کوم غبرگون ندی ښودل شوی.
د ډان ورځپاڼې ایډیټر ظفر عباس چې ورځ تر بلې پرې فشارونه زیات شوي دي، وایي چې پاکستاني صحافیانو پخوا هم ډېرې سختې پابندۍ لیدلي، په شمول د دې چې ورځپاڼې یې بندې شوي، خبریالان په جېلونو کې اچول شوي، یا ډایرکټ یې رپوټونه او خپرونې سینسر شوي دي. خو هغه زیاتوي، "هغه څه چې مونږ یې نن د ریاستي ادارو لخوا د فشار په بڼه کې گورو، لکه په مهمو خبرونو سترگې پټول او خود سانسوري، دا تر هغه مخکې فشارونو ډېر زیات خراب دي."
په کراچي کې د صحافیانو د انجمن مشر، اشرف خان وایي، چارواکي د پاکستان د سایبري جرمونو د قانون څخه، په سوشل میډیا کې د آزادۍ د ټکولو په مقصد ناوړه استفاده کوي.
اشرف خان زیاته کړه چې پاکستاني چارواکي د ټویټر او فیسبوک په شان سوشل میډیا کمپنیو نه هم غوښتنه کوي چې د یو شمیر مختلفو دلایلو پر اساس دې د ځینو کسانو اکاونټونه وتړي.
بل خوا د ډان ورځپاڼې ایډېټر ظفر عباس وایي چې د پاکستان میډیا کارکوونکي له بدترین شرایطو سره مخ شوي، او که صحافیان او د میډیا ادارو مالکان مشترکه هڅه او مبارزه ونه کړي، نو د هغه په باور، په پاکستان کې چې صحافیانو په تیرو څو لسیزو کې پرمختگونه کړي و، هغه به ټول به اوبو لاهو شي.
