د پاکستان وزیراعظم شهباز شریف د امریکا د وارټن کالج نه فارغ او جی پي مارګن غوندې اعلی امریکايي بېنک سره تجربه لرونکی محمد اورنګزېب د خزانې نوی وزیر ټاکلی خو دا به کتل کیږي چې په اقتصاد کې د هغه تجربه به څنګه د پاکستان د قرض پېټی راکموي او اقتصادي پایه به په کوم رفتار تاووي.
د خزانې د نوي وزیر محمد اورنګزېب وروستی روزګار د حبیب بېنک سره وو. د مرکزي وزیر په توګه هغه به، د رایټرز خبري ادارې تر مخه، د هېواد 350 اربه ډالره برابر اقتصاد سمبالوي.
په شمېره د اقتصاد کچه لویه ښکاري خو د فبروري پورې راغلي رپوټونه ښيي چې په پاکستان باندې د بهرنیو او په کور دننه د قرضو پيټې دومره دروند شوی چې د ټول پېداوار 70 فیصده برخه د قرضونو په بېرته ورکولو کې مصرف کېږي.
د رایټرز خبري اداره وايي تمه ده چې په روان کال کې د پاکستان د ټولو شوو مالیو 50و نه تر 60و فیصده پورې پیسې يوازې په قرضونو باندې په سود ورکولو کې ولګي.
د پاکستان تجربه لرونکی بېنکر اورنګزېب خان چې وړاندې په کومه سرکاري څوکۍ نه دی پاتې شوی، د خزانې وزارت ورته په داسې وخت کې ورکړل شوی چې پاکستان د نړيوالې مالياتي ادارې نه په بېړنيو بنيادونو د پور اوږدمهاله لوظنامې ته اړتيا لري، د دې دپاره چې په ملک کې روانه ګراني راکمه شي، د غېر ملکي زر مبادله د کمي پوره کولو او د بهرنيو ملکونو د پور د ادايګيانو ستونزه هواره کړل شي.
پاکستان دا وخت د نړیوالې مالياتي ادارې سره د لنډ مهاله درې اربه ډالرو په پروګرام کې دی کوم چې راتلونکې مياشت سر ته رسي، خو پاکستان يو ځل بيا د نړیوالې مالياتي ادارې څخه د اوږدې مودې دپاره کلکو خبرو اترو ته ضرورت لري.
د اقتصاد پوهانو په وينا، اورنګزېب ته د پاکستان ټول اقتصادي چېلنجونه ورمخې ته دي او هغه ته تر ټولو غټ چېلنج دا دی چې يو ځل بيا د نړيوالې ادارې څخه پور ترلاسه کړي، په کوم چې پاکستان د 76 کالو راهسې روان دی.
د رپوټونو ترمخه، د نړيوالې مالياتي ادارې د پروګرام نه علاوه د خزانې نوي وزیر ته په راتلونکو درېو مياشتو کې قامي بجټ وړاندې کول دي چې پکې سخت اقتصادي اصلاحات او اقتصاد په خپلو پښو ودرول دي.
په داسې وخت چې رپوټونه وايي په پاکستان ملکي او غېر ملکي قرضې د 60زره اربه روپو نه سېوا شوې ده، او د پاکستان د شمېرنې د سرکاري ادارې ترمخه په ملک کې د ګرانۍ شرحه د فرورۍ په میاشت کې 23.7 فيصده وه، او د پاکستان د مرکزي بېنک ترمخه په ملک کې روان کال ګراني 25 فيصده اټکل شوې ده.
د روپۍ په مقابله کې د ډالر بيعه په پرانستي مارکيټ کې 283 روپۍ ده، او اقتصاد پوهان وايي که په غېر ملکي زر مبادله کې اضافه نه کيږي نو روپۍ د ډالر په مقابله کې نوره بې قدره کيږي.
د رويټرز ترمخه په پاکستان مجموعي قرضې د قامي امدنۍ (جي ډي پي) د 70 فيصده نه زیاتې شوي، او نړيوالې مالياتي ادارې او د اقتصاد د درجه بندو ادارو اټکل کړی دی چې روان کال به په پاکستان د قرضونو د سود شرحه د 50 نه تر 60 فيصده پورې ورسي، او دا په نړۍ کې د اقتصاد په حواله د يو هيواد تر ټولو بد حالت دی.
د اقتصادپوهانو په خبره، د پاکستان د خزانې نوي وزير ته به په اتحادي حکومت کې د اصلاحاتو کولو په لړ کې هم مشکلات ورمخې ته وي، او هغه به ملک ته د پانګونو راوړلو هغه پروګرام هم ګوري کوم چې په ځانګړي ډول جوړ کړل شوی په کوم کې چې د پاکستان پوځ هم شامل دی.
اقتصادپوھ ډاکټر غلام صمد وایي، پاکستان ته د بھرنیو پانگونو، برامداتو سېوا کولو، بھر نه ملک ته د زیاتو پېسو راوړل یا رالېږل، گراني قابو کول او تر ټولو غټ چېلنج د آی اېم ايف نه پور ترلاسه کول دي.
وي او ډیوہ سرہ خبرو کې نوموړي وویل، که ھر څوک د خزانې چارې سمبالوي، دا ټول چېلنجونه به ورته مخې ته وي، او د پاکستان اقتصاد سمبالول او په خپلو پښو ودرول اسان کار نه دی.
د غلام صمد په خبرہ د اورنگزېب خپله شخصي کارکردگي ښه ده او ھغه ټکنوکریټ دی مثبت یې اړخ یې دا دی چې سیاستوال نه دی او د آی اېم اېف نه به پور ترلاسه کړي خو که د چا دا خیال وي چې ھغه به ټولې مسلې ھواري، نو دا دومرہ اسان کار نه دی.
Forum