پاکستان به د افغانستان سره په پوله ۱۲ او د ایران سره په پوله شپږ "بارډر" مارکېټونه جوړوي چې چارواکي وايي دا ډول د سرحدي سیمو اوسېدوونکو دپاره د کاروبار موقعې برابر کړی شي.
د وزیراعظم عمران خان دفتر د زیارت، پنجشنبې، په ورځ په یو بیان کې وویل لومړي دوه ازماېښتي بارډر مارکېټونه به په بلوچستان کې او یو په خېبرپښتونخوا کې جوړیږي چې د اینده کال د فېبرورۍ د میاشت پورې به فعال کړی شي.
د بیان ترمخه په مجموعي توګه به ۱۸ بارډر مارکیټونه یا سرحدي بازارونه جوړیږي چې ۱۲ به د افغانستان سره په پوله او شپږ به د ایران په پوله وي.
پاکستان د افغانستان او ایران سره په سرحد د مارکېټونو یا بازارونو د جوړولو اعلان په داسې حال کې کړی دی چې د کرونا وایرس له امله سيمه اییز تجارت او د خلکو سفرونه کم شوي او تاجران وخت په وخت د دریو واړو ملکونو ترمنځ په تجارتي هلو ځلو کې د مشکلاتو او خنډانو شکایت کوي.
پاکستان د افغانستان سره په پوله د ازغن تار لګوولو کار شروع کړی او ویلي یې دي چې د ایران په پوله به هم دغه ډول انتظامات کوي.
د عمران خان د دفتر نه مطبوعاتو ته جاري شوی بیان وايي وزیراعظم او ګڼ شمېر لوړ رتبه حکومتي ماموینو ته په یوه غونډه کې د مجوزه بارډر مارکېټونو په اړه معلومات ورکړی شول او ووېل شوو چې دغه مارکېټونه به په سرحدي علاقو کې مېشته خلکو ته د کاروبار بهتر سولتونه ورکړي.
د بیان ترمخه وزیراعظم عمران خان غونډې ته وویل سرحدي مارکېټونه به ځوانانو ته د روزګار او تجارت اسانتیاوې برابر کړي او په پوله د ازغن تار د لګېدو وروسته به تجارت منظم او د سمګلنګ مخه به ونیسي.
د وزیراعظم دفتر وویل د مجوزه بارډر مارکېټونو په اړه غونډه کې د خارجه وزیر شاه محمود قرېشي، د پوځ مشر قمرجاوېد باجوه، د خېبرپښتونخوا اعلا وزیر محمود خان، د بلوچستان اعلا وزیر جام کمال خان، د سي پېک اتارټۍ مشر جنرل ر عاصم سلیم باجوه او ګڼ شمېر نور پوځي او غیر پوځي مامورینو برخه واخیسته.
