پاکستان د افغان طالبانو دوه نور مشران د زندان څخه ازاد کړې دي. دا خبر د اېسوسي اېټېډ پرېس ( ای پي ) خبري ادارې ورکړی دی.
افغان طالبانو د گل یا دوشنبې په ورځ د ملا عبدالصمد ثاني او کمانډر صلاح الدین د پاکستاني زندان نه د خوشې کېدیو د خبر تائید وکړو.
د جېل څخه په خوشې کړی شویو طالب مشرانوکې عبدالصمد ثاني د ٩٠ په لسیزه کې د طالبانو د واک په وخت افغانستان کې د مرکزي بېنک گورنر وو.
د یولسم ستمبر پېښې وروسته د نورو یوشمېر افغان طالبانو ترڅنگ امریکې عبدالصمد ثاني هم د مطلوبه ترهگرو په فهرست کې شامل کړی و.
د افغان طالبانو دوه ذمه وارو کسانو د امریکې د انگرېزۍ ژبې ورځپاڼې واشنگټن پوسټ ته د نوم نه ښودلو په شرط ویلي دي چې د پاکستان د زندان نه د لاندې کچې یو بل طالب کمانډر صلاح الدین هم خوشې کړې شوې دې.
د طالبانو د دې مشرانو د خوشې کېدلو خبرونه په داسې وخت کې مخې ته راغلي دي چې افغانستان کې د سولې د خبرو لپاره د امریکا خصوصي استاذې زلمې خلیل زاد یو ځل بیا د سېمې د هېوادونو په سفر دی.
خلیلزاد ددې نه وړاندې هم د تېر اکتوبر په میاشت کې د پنځه هېوادونو پاکستان، افغانستان، سعودي عرب، قطر او متحده عرب اماراتو سفر کړی و او د دغه سفر په وخت هم یو طالب مشر ملا عبدالغني برادر د پاکستان د جېل څخه خوشې کړی شوی و.
زلمی خلیلزاد دا مهال په افغانستان کې د سولې په غرض یو وارې بیا د سېمې په سفر دی.
سټېټ ډپارټمنټ ویلي خلیلزاد به د نومبر د اتمې نېټې نه تر د ٢٠ مې نېټې پورې د افغانستان، پاکستان، متحده عرب اماراتو او قطر سفر کوي او وزارت وویل خلیلزاد به د افغان حکومت ترڅنگ د ټولو اړوندو ډلو سره په افغانستان کې د طالبانو په شمول د امن بهیر په وړاندې بوتلو په موضوع خبرې کوي.
زلمی خلیلزاد د سیمې ورستی سفر او د طالبانو د دوو نورو مشرانو د ازادیدو خبر په داسې حال کې مخې ته راغلی دی چې په افغانستان کې د امن دپاره کوښښونه په نړيواله گړندي شوې دي.
د جمعې په ورځ روس په ماسکو کې په افغانستان کې د امن په موضوع د یو شمېر هېوادونو د غونډې کوربتوب وکړو. دا لومړی ځل و چې د ماسکو په غونډه کې امریکايي او طالب استازي په یوه غونډه کې په یو ځای کېښناستل.
