لاس رسیدونکی لینک

تازه خبر

پاکستان

قرېشي: د امریکې نوی حکومت دې د افغانستان د امن بهیر په خپل ځای وساتي

په قطر کې د افغان حکومت او طالب استازو د امن خبرې شروع کړي دي
په قطر کې د افغان حکومت او طالب استازو د امن خبرې شروع کړي دي

د پاکستان خارجه وزیر شاه محمود قرېشي د امریکې د نوي صدر جوبایډن نه غوښتلي چې په افغانستان کې د سولې دپاره شروع شوی بهیر دې په خپل ځای وساتي او په وړاندې دې بوځي.

د الجزیره ټېلې وژن سره مرکه کې شاه محمود قرېشي وویل "ځما په خیال دوی (د بایډن حکومت) دې دا خبره احساس کړي چې اوس په افغانستان کې یوه موقع ده او دوی ته پکار دي چې د بېرته بوتلو پرځای دې د دې ساتنه وکړي."

د امریکې نوي صدر جوبایډن د شورو، چهارشبنې، په ورځ د خپلې چوکۍ سوګند پورته کړی دی او د خارجه وزارت دپاره یې اېنتني بلېکن نامزد کړی دی.

د نهې، سه شنبې، په ورځ په سېنټ کې د بلېنکن په نامزدګۍ بحث کې هغه وویل د صدر بایډن حکومت به طالبانو سره د پخواني صدر ډانلډ ټرمپ د اقتدار په مهال شوي معاهدې ته بیا کتنه کوي. هغه وویل امریکا باید داسې وسایل ولري چې ترهګري بیا سر راپېدا نه شي.

د ای اېف پي خبري ادارې ترمخه ښاغلي بلېنکن د سېنټ دغه اورونې ته وویل "مونږ دا جنګ ختمول غواړي چې نه ختمېدونکی بلل شوی دی. مونږ خپل ځواکونه کور ته راوستل غواړو. مونږ غواړو چې څه صلاحیت ولروو چې د ترهګرۍ د بیا پېدا کېدلو مخه نیولی شي."

نوي صدر جوبایډن انتوني بلېنکن د خارجه وزارت دپاره نامزد کړی دی
نوي صدر جوبایډن انتوني بلېنکن د خارجه وزارت دپاره نامزد کړی دی

د رپورټ ترمخه بلېنکن وویل غواړي چې د نژدې نه وګوري چې د طالبانو سره د امریکې په معاهده کې په څه خبرې شوي دي.

په افغانستان د امن به غرض د افغان حکومت او طالب استازو په قطر کې خبرې شروع شوي دي.

د دې مذاکراتو بنیاد هغه معاهده ده چې د صدر بایډن پېش رو صدر ډانلډ ټرمپ د حکومت په مهال امرېکې او طالبانو د تېر کال د فېبروۍ په میاشت کې په قطر کې لاس لیک کړې ده. د دغه معاهدې دلاندې طالبانو په افغانستان کې په امریکايي ځواکونو حملې ودرولي او دا خبره به هم یقیني کوي چې طالبان به د القاعده او نورو وسله والو ډلو سره تعلقات ختموي او د افغانستان خاور به د ترهګرۍ دپاره استعمال ته نه پرېږدي. د لوظنامې ترمخه به امریکا او نېټو د کال ۲۰۲۱ د می د مياشت پورې خپل ځواکونه دافغانستان څخه وباسي.

د پخواني صدر ډانلډ ټرمپ د صدارت په اخېرۍ ورځو کې امریکې په افغانستان کې د خپلو عسکرو شمېره ۲۵۰۰ ته راکمه کړې ده.

افغان حکومت د ښاغلي قریشي په خبرو خپل دریځ نه دی څرګند کړی خو تېره ورځ د افغانستان د سولې د مرکچي پلاوي غړي مولوي عطا الله لودین ازادي راډيو سره په خبرو کې وویل چې هغه تړون تر ډېره طالبانو ته امتیازات ورکړي وو او افغان حکومت په کې ظاهراً یوې څنډې ته شوی دی.

د الجزیره سره مرکه کې ښاغلي قرېشي وویل په افغانستان کې د سولې دپاره د موجوده کوښښونو په اړه وویل "د ډېر وخت نه پس مونږ په سم لوري روان شوي یوو. "

شاه محمود قرېشي وویل پاکستان د افغانستان د امن په بهېر کې مرسته کړې ده خو هغه زیاته کړه ځېنې عناصر د امن دپاره حالات خرابوول غواړي.

بلخوا د امریکې د دفاع نوي ګمارل شوي وزیر پخواني جرنېل لاییډ اسټن ویلي په افغانستان کې د امن دپاره به د پاکستان سره همکاری کوي خو په پاکستان به فشار هم زیاتوي چې خپله خاوره ترهګرۍ دپاره استعمالېدو ته ورنکړي.

د افغانستان او پاکستان په اړه دغه خبرې ښاغلي اسټن د هغه د نامزدګۍ په اړه په سېنټ کې اورېدنې ته کړي دي.

لاییډ اسټن ویلي پاکستان افغانستان کې مهم کردار لوبولی شي او القاعده او داعش خراسان ته ماتې ورکولو او د سیمې ثبات ته د ودې ورکولو د پاره امریکا د پاکستان سره کار ته اړتیا لري.

See all News Updates of the Day

د پاکستان د قانون وزیر وایي حکومت سره په تحریک انصاف د بندیز لګولو لپاره ثبوتونه شته

د پاکستان د قانون مرکزي وزیر ښاغلی اعظم نذیر تارړ وایي حکومت سره په پاکستان تحریک انصاف ګوند د بندیز لګولو لپاره ثبوتونه شته.

د چارشنبې- شورو په ورځ د پارلیمان ودانۍ کې خبریالانو سره خبرو کې د قانون وزیر ویلي چې وفاقي حکومت په تحریک انصاف د بندیز لګولو په معامله په سنجیدګۍ سره غور کوي .

نوموړي ویلي په تحریک انصاف د بندیز لګولو لپاره د ریفرنس دایر کولو نه وړاندې به حکومت خپل ایتلافیان په اعتماد کې اخلي اؤ ټولو سیاسي اؤ قانوني اړخونو ته له کتلو وروسته به ریفرنس سپریم کورټ کې دایروي.

روانه میاشت د پاکستان د اطلاعاتو مرکزي وزیر عطا تارړ ویلي وؤ حکومت په تحریک انصاف ګوند د بندیز لګولو اؤ ددغه ګوند د باني عمران خان، د پخواني صدر ډاکټر عارف علوي اؤ د پخواني سپیکر قاسم سوري په ضد د غدارۍ د مقدمې چلولو پرېکړه کړې ده.

د حکومت له دغې پرېکړې سره د پاکستان دننه اؤ بهر سخت مخالفتونه ښودل شوي اؤ دا د جمهوریت په ضد ګام بلل شوی دی.

په پاکستان کې د حکومت مخالفو ګوندونو تر څنګ امریکې هم په تحریک انصاف ګوند د بندیز لګولو پرېکړې ته سخت غبرګون ښودلی.

په ۱۶م جون د امریکې د بهرنیو چارو د محکمې ویاند په تحریک انصاف ګوند د بندیز لګولو په اړه د پاکستان د حکومت پرېکړې ته خپل غبرګون کې ویلي وؤ چې دې لړ کې یې حکومتي بیانونه لیدلي اؤ داسي ښکاري چې دا د یو پېچلي سیاسي عمل اغاز یا پیل دی.

تېره ورځ د امریکې د استازو د ایوان غونډه کې د یوې اوریدنې په مهال هم د کانګریس غړي بریډ شرمین د پاکستان د حکومت له لوري په تحریک انصاف ګوند د بندیزونو لګولو په اړه پوښتنې راپورته کړې وې اؤ ویلي یې وؤ د پاکستان وزیرانو ویلي چې په پي ټي آي بندیز لګول غواړي.

هغه وویل د پاکستان وزیرانو دا هم ویلي چې حکومت به په بهرنیو هیوادونو کې د میشت هغو پاکستانیانو شناختي کارډونه اؤ پاسپورټونه منسوخوي چې په حکومت نیوکې کوي.

بریډ شرمین ویلي وؤ دا د شهریانو اؤ ګرین کارډ لرونکو په حقونو حمله ده، مونږ وینو چې د پي ټي آي دفتر هم تړل شوی دی اؤ د هغوي ګڼ شمیر ښځینه اؤ نارینه مشران نیول شوي .

هغه ویلي وؤ مونږ سره د جمهوریت په پلوۍ د ودرېدو موقعه په لاس کې ده اؤ زیاته کړې یې وه چې پي ټي آي امریکا پلوه ګوند نه دی خو هغه د پاکستان تر ټولو ستر سیاسي ګوند دی اؤ مشر یې په زندان کې اچول شوی.

نوموړي ټینګار کړی ؤ چې باید پاکستان کې د امریکې سفیر ډونلډ بلوم عمران خان سره ملاقات لپاره جېل ته ولېږلی شي.

د پاکستان حکومت لا د بریډ شرمین تازه څرګندونو ته څه جواب نه دی ویلی.

خو تر دې وړاندې د ملګرو ملتونو یوې ادارې چې خپل رپورټ کې د عمران خان نیول اؤ زندان ته اچول د بشري قوانینو په ضد بللي وؤ اؤ هغه ته یې د تاوان یا هرجانې ورکولو غوښتنه کړې وه نو پاکستان د ملګرو ملتونو دغه رپورټ غیر ضروري اؤ بې ځایه بللی و.

میا افتخار حسېن: د اسټیبلشمنټ او عدلیې روانې جګړې نه باید ولس ځان په ډډه وساتي

د عوامي نیشنل پارټۍ د خېبر پښتونخوا صوبې صدر میا افتخار حسین وایي په ملک کې روانه جګړه د اسټیبلشمنټ [پوځ] اؤ عدلیې تر منځ ده او وایي قام دې دغې جګړې ته نه وردانګي.

د خپل زوي میا راشد حسین د 14م تلین په مهال د چارشنبې- شورو په ورځ له خبریالانو سره خبرو کې میا افتخار حسین ویلي اسټیبلشمنټ اؤ عدلیې د سیاسي ګوندونو په اوږو ټوپک ایښی اؤ خپل مقاصد پوره کوي.

میا افتخار حسین په پوځ اؤ عدلیه غږ وکړو چې خپله دا جګړه باید پاي ته ورسوي اؤ ويې ویل که چرې دا جګړه نه ختمیږي نو بیا باید قام دې جګړې ته ورټېل نه وهل شي.

هغه وویل پښتونخوا صوبه د ډېرې اوږدې مودې نه ترهګرۍ اؤ‌ پوځي عملیاتو ځپلې ده اؤ اوس که یو ځل بیا د ولس له باور پرته په ملک کې نوي عملیات کیږي نو دا به د هیواد په ګټه نه وي.

میا افتخار حسین وویل د ترهګرۍ خلاف که عملیات کیږي اؤ که هر رقم ګامونه اخستل کیږي نو باید په هغې کې د ولس ملاتړ ترلاسه کړل شي.

په دې وروستیو کې په پاکستان کې د عدلیې ججانو په استخباراتي اؤ پوځي شبکو په عدالتي چارو کې د لاسوهنې تورونه پورې کړي اؤ ویلي یې دي چې ایجنسۍ له بیلابیلو لارو د ججانو اؤ د هغوي د کورنیو د تنګولو له لارې ججان د فشار لاندې ساتل غواړي.

د جون د میاشتې په ۲۳مه نېټه د پنجاب صوبې د سرګودې د ترهګرۍ ضد عدالت جج په استخباراتي ادارې (آي اېس آی) د ځورولو ‏تورونه لګولي وؤ.

تر دې وړاندې د مارچ د میاشتې په وروستيو کې د اسلام اباد هايکورټ شپږو ججانو په عدليه کې د استخباراتي ادارو د ښکاره مداخلې پر ضد سپريم جوډيشل کونسل ‏‏ته خط ليکلى ؤ او غوښتنه يې کړې وه چې د ښکاره مداخلې او په قاضیانو د فشار راوړلو په اړه دې یو قضایي کنونشن راوبلل شي.‏

دا خط د اسلام اباد هایکورټ دشپږو ججانو جسټس محسن اختر کیاني، جسټس طارق محمود جهانګیري، جسټس بابر ستار، جسټس سردار اعجاز ‏‏اسحاق، جسټس ارباب محمد طاهر او جسټس تمیم رفعت امتیاز لخوا لیکل شوی وو.

دا په داسې حال کې ده په دې وروستیو کې پاکستاني عدالتونو په شمیر مقدمو کې بندي د تحریک انصاف ګوند مشرانو ته ضمانتونه ورکړي اؤ هم سپریم کورټ د پارلیمان د ځانګړو څوکیو د ویشلو د مقدمې فیصله د تحریک انصاف په حق کې اورولې ده اؤ څیړونکي وایي چې د هیواد طاقتور پوځ د عدلیې په دې فیصلو خوشحاله نه ده.

د پاکستان د مرکزي حکومت وزیران هم وخت په وخت په عدالتي فیصلو ښکاره نیوکي کوي.

د بنو په پېښه د ایپکس کمېټې غونډه نن په پېښور کې کیږي

ټاکل شوې ده د بنو په پېښه د خېبر پښتونخوا د حکومت له لوري د رابلل شوې ایپکس کمیټې غونډه نن (زیارت ـ پنجشنبه) په پېښور کې کیږي چې پکې به د حکومتي اؤ امنیتي چارواکو تر څنګ د بنو نه پینځه کسیزه ډله هم برخه اخلي.

د ډان نیوز له مخې د وزیراعلا په امر رابلل شوې د ایپکس کمیټې دې غونډې ته به شپاړس بیلابیلې غوښتنې مخې ته اېښودل کیږي.

په غونډه کې به د بنو څخه صوبایي وزیر پښتون یار خان، د عوامي نیشنل ګوند باز محمد خان، د جماعت اسلامي پروفیسر محمد ابراهیم، د صوبایي اسمبلۍ غړی ملک عدنان وزیر، اؤ د بنو چیمبر اف کامرس نایب صدر ناصر بنګښ هم ګډون کوي.

ډان وايي د بنو دا پینځه کسیزه ډله به ایپکس کمیټې ته ۱۶ غوښتنې وړاندې کوي چې هغې کې عزمِ استحکام عملیاتو سره مخالفت، د ښو اؤ بدو طالبانو د مرکزونو ختمول، د شپې په وخت پولیسو ته د ګزمو اجازت ورکول، د پوځ پر ځای په سیمه کې سي ټي ډي ته د کارروایو کولو اختیار ورکول شامل دي.

صوبایي حکومت دا غونډه وروسته له هغې رابللې چې په نولسم جولایي بنو کې د امن لاریون په برخه والو ډزو کې یو تن وژل شوی اؤ ۲۳ نور ژوبل کړی شوي وو.

پي ټي ایم اؤ مدني فعالانو ددې ډزو پړه په پوځ ور اړولې خو د پوځ ویاند لیفټننټ جنرال احمد شریف بیا ویلي چې ډزې په امن لاریون کې شاملو وسله والو کړې دي.

د خېبر پښتونخوا حکومت ددغه پېښې د پلټنو لپاره د وړاندې نه د کمیشن جوړولو اعلان هم کړی دی.

ددغه پېښې په ضد اؤ په بنو ښار کې امن دپاره احتجاجي پرلت روان دی اؤ د پرلت مشرانو اعلان کړی چې استازي به یې د ایپکس کمیټې غونډه کې برخه اخلي خو د هغې تر څنګ به د تیرو شپږو ورځو راهسې روان خپل احتجاجي پرلت هم دوامداره ساتي .

د خېبرپښتونخوا د صحت وزیر پښتون يار خان وي او اې ډيوه سره خبرو کې ویلي، د ده په ګډون د پرلت د کمېټۍ پينځه غړي د وزيراعلا علي امين ګنډاپور په مشرۍ د اېپکس کمېټۍ په غونډه کې ګډون کوي.

هغه ویلي "د وزيراعلا په خصوصي دعوت د اېپکس کمېټۍ غونډې ته بلل شوي، په غونډه کې به د بنو پرلت په 16 غوښتنو خبرې کيږي".

هغه زياته کړه، "وزيراعلا د وړاندې نه د پرلت غوښتنې منلي او هغه پرې د اېپکس کمېټۍ غونډه رابللې او د جمعې په ورځ به بيا وزيراعلا په خپله پرلت ته راځي."

پښتون يار خان دا هم وويل، د بنو د پرلت په غوښتنو، او هلته د امنیت دپاره پورته کړل شوي ګامونه به د صوبې په نورو برخو کې هم عملي کولی شي.

امریکايي سفیر وايي پاکستان دې د خپلو شهریانو د رای د ازادۍ احترام وکړي

په اسلام اباد کې د امريکې سفیر ډانلډ بلوم
په اسلام اباد کې د امريکې سفیر ډانلډ بلوم

په اسلام اباد کې د امريکې سفیر ډانلډ بلوم ويلي پاکستان دې د خپلو شهریانو د دې حق احترام وکړي چې په ازادۍ د خپلې رای اظهار او سیاسي غونډې وکړی شي.

امریکايي سفیر دغه خبره په داسې حال کې کړې چې په زندان کې بند د پخواني وزیراعظم عمران خان د پلویانو خلاف د پوځ په ملاتړ حکومتي اقدمات دوام لري.

بلوم په اسلام اباد کې په یو سېمينار کې په دې خبره ټینګار وکړو چې د ولس د اییني حقونو تحفظ د پاکستان د اقتصادي ترقۍ دپاره اهمیت لري.

هغه وویل د هرچا د انساني حقونو تحفظ نه یوازې د جمهوریت بنیادي ستنه ده بلکې دا د باثباته او متحرکه ټولنې بنیادي برخه ده چې د ملک د ترقۍ دپاره په کې د ټولو شهریانو د صلاحیتونو ونډه شامله وي.

امریکايي سفیر زیاته کړه چې د داسې ډول ثبات نه بغیر د سرمایه کارۍ او د اقتصادي ودې امکانات ډېر غېر یقیني ښکاري.

بلوم په پاکستان کې د سیاسي کړکېچ په مهال د شهریانو د بنیادي ازادیو په اړه خبرې کړې. دا کړکېچ په ۲۰۲۲ کې د عدم اعتماد تحریک دلارې د عمران خان حکومت د ختمېدو او تېر کال د اګست په میاشت کې د هغه د قېد کېدو راهسې شروع شوی دی. ملګرو ملتونو ویلي د عمران خان قېد څه قانوني بنیاد نه لري.

د عمران خان پاکستان تحریک انصاف پارټۍ خلاف د حکومت په اقداماتو کې د هغه په سلګونو پلویان نیول شوي دي. دا هفته پولیس په اسلام اباد کې د پي ټي ایي په مرکزي دفتر چاپه ووهله، د ګوند مرکزي ترجمان او د پي ټي ايي د مطبوعاتو څانګې نور کارونکي يې د ریاست خلاف د کېمپېن چلولو په الزام ونیول.

د وزیراعظم شهبازشریف اتحادي حکومت چې د ملک ژورو اقتصاي مشکلاتو سره مخامخ دی، دا اراده يې څرګنده کړې چې د ریاست په ضد د هلو ځلو او د پوځ د بدنامولو په الزام په پي ټي ايي پابندي لګول غواړي.

د شورو، چهارشنبې، په ورځ د کابېني د غونډې په موقع شهبازشریف دا خبره تکرار کړه چې په هېڅ حال کې به د ملک، د بې ګناه خلکو او د پاکستان د مسلح ځواکونو خلاف داسې ډول ګامونه برداشت نه کړی شي.

په پي ټي ايي د بندیز دړکو په پاکستان کې سیاسي تاوتریخوالی نور زیات کړی او د نهې، سه شنبې، په ورځ يې ذکر په واشنګتن کې د کانګرس د اورونې په مهال د امریکايي سفارتکار ډانلډ لو سره د سوالونو او جوابونو په وخت هم وشو.

د کانګرس د هاوس اف رېپرېزېنټېټیوز د خارجه چارو د کمېټۍ د ډېموکرېټېک پارټۍ غړي برېډ شرمېن د عمران خان د ګرفتارۍ په اړه خبرو کې د لو نه پوښتنه وکړه چې ایا په اسلام اباد کې امریکايي سفیر ته وېل کېدی شي چې عمران خان سره ملاقات وکړي، نو لو وویل په دې اړه به د بلوم سره خبرې وکړي.

په کانګرس کې د اورونې وروسته شېرمېن په اېکس، پخواني ټوېټر، وویل د پاکستان د مستقبل فېصله به يې ولس کوي، دا واضحه ده چې پي ټي ايي د پاکستان د ټولو نه زیاته مقبوله پارټي ده لیکن دا د پاکستان د خلکو حق دی چې د خپل مشر انتخاب وکړي.

تېر کال د عمران خان د ګرفتارۍ خلاف په لارو کوڅو کې پرتشدد احتجاجونه راوپارېدل او د هغه ځینو پلویانو د پوځ په ځینو سهولتونو هم حملې وکړې. د شهبازشریف حکومت او پوځ په عسکري سهولتونو حملې د پي ټي ايي خلاف ګامونو او عمران خان د بندي ساتلو په دفاع کې استعمال کړي دي خو په وروستیو ورځو کې عدالتونود عمران خان خلاف ځینې مقدمې د ثبوت د نیشتوالي په سبب خارج کړي دي.

دا هفته سپریم کورټ پي ټي ايي ته په پارلېمنټ کې خصوصي چوکۍ ورکړې او په خپله فېصله کې وویل الېکشن کمېشن په غېر اییني توګه پي ټي ايي د دغو چوکو نه محرومه کړې وه. د عدالت فېصله د عملي کېدو په نتیجه کې به د پي ټي ايي د غړو شمېره زیاته او د شهبازشریف ایتلافي حکومت به کمزوری شي.

د سپريم کورټ فېصلې د حکومت مخالفو ګوندونو او د بې طرفه څارونکو د دې الزاماتو تاید کړی چې د فېبرورۍ په اتمه نېټه عامو انتخاباتو کې د پوځ پلوه ډلو په حق او د پي ټي ايي خلاف درغلي شوې ده.

یو اوویه کلن عمران خان په هغه لګول شوي ټول الزامات ردوي، وايي دا په سیاسي بنیادونو او د پوځ په کوښښ لګول شوي چې هغه د اقتدار نه لرې وساتي.

پوځ د شهبازشریف ملاتړ کوي او د هغه حکومت دا خبره ردوي چې پي ټي ايي خلاف غېر منصفانه ګامونه پورته کوي. حکومت دا عزم هم څرګند کړی چې د کال ۲۰۲۳ د می په نهمه نېټه په پوځي اسانتیاو حملو کې ککړ کسان په د انصاف سره مخامخ کوي.

تېره میاشت د امریکې د کانګرس هاوس اف رېپرېزېنټېټیوز د اووه به مقابله کې په ۳۶۸ ووټونو یو قراراداد منظور کړو چې په کې غوښتنه شوې چې د پاکستان په انتخاباتو کې دې د مداخلت او د بې قانونیو د دعوو ازادانه تحقیقات وکړی شي. اسلام اباد دغه قرارداد مسترد کړی دی.

د پاکستان د خزانې مرکزي وزير په درې ورځني سفر چين ته تللی


چين ته د تګ نه وړاندې د خزانې مرکزي وزير محمد اورنګزيب شخصي ټي وي چينل جيو نيوز ته وویل، چې چين ته د هغه د سفر په اېجنډا کې د پاکستان دننه د توانايۍ په څانګه کې د اصلاحاتو او د پانډه بانډز په سر د چينايي چارواکو سره خبرې کول شامل دي
چين ته د تګ نه وړاندې د خزانې مرکزي وزير محمد اورنګزيب شخصي ټي وي چينل جيو نيوز ته وویل، چې چين ته د هغه د سفر په اېجنډا کې د پاکستان دننه د توانايۍ په څانګه کې د اصلاحاتو او د پانډه بانډز په سر د چينايي چارواکو سره خبرې کول شامل دي

د پاکستان د خزانې مرکزي وزير محمد اورنګزېب ويلي، د چين په سفر کې به هغه د چينايي چارواکو سره د توانايې په څانګه کې په اصلاحاتو خبرې کوي خو څيړونکي وايي د دې سفر بنيادي مقصد د چين سره د انرژۍ په څانګه کې پاکستان ته پاتې د 15 اربه ډالرو قرضې ستنولو مېعاد غځول دي.

بل لور ته د پاکستان مرکزي بېنک سټېټ بېنک ویلي، په تېر مالي کال 2023/24م کې د کرنټ اکاونټ خساره په ریکارډ کچه کمه شوې او اقتصاد پوهان وایی د بهر هیوادونو څخه په ترسیلات زر کې زیاتوالی او تجارتي خسارې د کمي له وجې په امدن او خرڅونو کی فرق کم شوی خو په راتلونکې کې دې سره په اقتصادي پرمختیا یا شرح نمو هم اثرات کېدای شي.

چين ته د تګ نه وړاندې د خزانې مرکزي وزير محمد اورنګزيب شخصي ټي وي چينل جيو نيوز ته وویل، چې چين ته د هغه د سفر په اېجنډا کې د پاکستان دننه د توانايۍ په څانګه کې د اصلاحاتو او د پانډه بانډز په سر د چينايي چارواکو سره خبرې کول شامل دي.

مطبوعات د سرچينو له قوله وايي د پاکستان د خزانې وزیر به د چين په سفر کې په ممکنه ډول چينايي کمپنیو د انډيپنډنټ پاور پروډيوسر د 15 بيلينه ډالرو قرضې د مودې په غځولو هم خبرې وکړي.

د اقتصادي چارو ماهرين وايي چې خزانې وزیر به د چينايي چارواکو سره د چين د انرژۍ د څانګې په ګردشي قرضو هم خبرې کوي دا قرضې اوس مهال نزدې 500 اربه روپۍ ته رسېدلې دي.

مطبوعاتي رپورټونه وايي چې د پاکستان د خزانې مرکزي وزير محمد اورنګزيب به چين د خپل سفر په مهال چينايي چارواکي سره د سي پېک منصوبو کې د شوو پرمختګونو څخه هم خبر کړي.

چين د پاکستان چاينا اقتصادي راهدارۍ د منصوبې يا سي پېک لاندې په پاکستان کې د توانايۍ او سړکونو په منصوبو کې نزدې د 64 بيليونه ډالرو سرمايه کاري کوي خو په دې تېرو وختونو کې د سي پېک په منصوبو کار ورو شوی، او غټ علت یې په پاکستان کې په چينايي کار کوونکو حملې بلل کېږي خو پوهان وايي ددې نه علاوه هم ځينې نور وجوهات شته.

اقتصاد پوه شاهد محمود وايي، "د سي پېک په دوېم پړاو چين کار ځکه نه شورو کوي چې چين غوښتنه کوي بايد لومړي پړاو کې د توانايې د انډپنډنټ پاور پروډيوسر پاتې پېسې ورکړي او مونږ هم د سي پېک د لومړي پړاو د پروژې نه هيڅ ګټه پورته نه کړه او دغه خو تشې قرضې دي چې اوس يې مونږ بېرته نه شو واپس کولی".

د پاکستان د خزانې مرکزي وزير په داسې وخت کې د چين سفر کوي چې پاکستان په روانه میاشت کې د نړیوالې مالياتي ادارې (آي اېم اېف) سره د سټاف په کچه د اووه اربه ډالرو قرض بل تړون لاسلیک کړی دی.

بل لور ته سټېټ بېنک ويلي، د 2023/24م مالي کال کې د امدن او خرڅونو په منځ کی فرق 68 کروړه او 10 لاکه ډالرو ته راکوز شوی دی.

د دې نه وړاندې په 2022/23م مالي کار کې کرنټ اکاونټ خساره 3 اربه او 27 نیم کروړه ډالره وه. بینک وایی په دې کې 79 فیصدي کمی راغلی دی.

اقتصاد پوهان وایی په ترسیلات زر کې 11 فیصده زیاتوالی او تجارتي خساره کې د 6 فیصده کمي له وجې دا فرق راکم شوی دی.

تیره ورځ د پاکستان وزیر اعظم شهباز شریف د برآمداتو پرمختیایي بورډ ته ویلي وو، چې ملکي برآمدات یې زیات کړي او دا کال به یې 60 اربه ډالره ته ورسوي.

اقتصاد پوهان وایي د پاکستان اقتصاد په درامداتو اډاڼه لري او په درامداتو د بندیزونو او د حکومتي ټیکسونو له وجې اغیزمن کیدی هم شي.

اقتصاد پوهان وايي، پاکستان دا وخت د غېر ملکی زرمبادله د کمي سره مخ دی او که خساره سېوا کیږی نو دې سره به د پاکستانی روپۍ په قیمت هم منفي اغېزې کيږي.

نور کتل

بي بي شیرینه

بي بي شیرینه: په ټیلې ویژن
please wait

No media source currently available

0:00 1:59:58 0:00
XS
SM
MD
LG