د پاکستان د اطلاعاتو مرکزي وزير عطا تارړ ويلي، د کرغزستان د حکومت سره په تماس کې دي، هلته حالات سميږي او د پاکستانيانو زده کوونکو ستنولو لړۍ روانه ده.
تارړ پرون د اتوار په ورځ د لاهور په هوايي اډه راستنېدونکو زده کوونکو هرکلي له ورغلی او ویلي يې دي 175 زده کوونکي رارسېدلي، او حکومت د کرغزستان څخه په ورځ کې د څلورو الوتکو چلولو ځانګړی اجازت ورکړی دی.
هغه ويلي، زده کوونکو ته به هر ډول ممکنه مرستې ورکوي، په کرغزستان کې د تشدد د پېښو له امله په خلکو کې ويره خوره شوې خو اوس هلته حالات سم شوي دي.
دوه ورځې وړاندې د منځنۍ اېشیا د کرغزستان هېواد په سرښار بشکيک کې په پاکستاني او نورو بهرنيو زده کوونکو د تشدد خبرونه مخې ته راغلي، د پاکستان وزيراعظم شهباز شريف د زده کوونکو په حال ژوره اندېښنه څرګنده کړې او ويلي یې وو، بشکيک کې یې پاکستاني سفير ته د زده کوونکو هر ډول مرستې لارښوونه کړې ده.
په ټولنيزو رسنيو ويډيوګانې خپرې شوي چې پکې د تشدد پېښې ليدل کیږي، ځينو کسانو پاکستاني زده کوونکو ته د مرګ ژوبلو اوښتو خبرونه هم ورکړي دي.
عطا تارړ د اتوار په ورځ لاهور کې د مرستيال وزیراعظم او بهرنيو چارو وزير اسحاق ډار او کشمیر د چارو مرکزي وزیر امير مقام سره په خبري غونډه کې ویلي، بشکیک کې څوک پاکستانی زده کوونکی نه دی وژل شوی، يو سياسي ګوند د کرغزستان پېښې ته غلط رنګ ورکوي.
هغه ویلي، د دوه زده کوونکو ډلو ترمنځ نښته شوې او پاکستاني زده کوونکي هم د دغه نښتې ښکار شوي پاکستانيان یې هدف نه وو. هغه زياته کړې، په پېښو کې شپږ پاکستاني زده کوونکي ژوبل شوي او په مختلفو روغتونونو کې یې درملنه روانه ده.
د تارړ په خبره کوم زده کوونکي چې راستنېدل غواړي، د راوستلو دپاره یې خصوصي انتظامات شوي، ټوله خرچه به یې حکومت برداشت کوي. له دې وړاندې په بشکيک کې پاکستاني زده کوونکو د وټس اېپ د لارې وي او اې ډیوه ته ويلي وو دوی په خپلو ځايونو کې بند پاتې دي، سخت په ويره کې دي.
په پاکستاني طالبعلمانو د شوي تشدد په سر د پاکستان خارجه دفتر د کرغزستان د سفارتخانې ناظم الامور رابللی او په دغه پېښه ېې ورته سخت احتجاج کړی دی. د پاکستان د خارجه دفتر ویاندې ممتاز زهره بلوڅ ويلي وو په بريدونو کې هیڅ یو پاکستانی نه دی وژل شوی او نه هم په کومه پاکستانۍ مېرمنه جنسي تیری شوی دی.
پاکستاني رسنیو د خالي یا شنبې په ورځ ویلي د کرغزستان د سفارتخانې ناظم الامور په دغه پېښه خارجه دفتر ته بلل شوی او د پاکستان لخوا ورته په یاده پېښه خپلې اندېښنې ښودل شوې وې.
پاکستان د کرغزستان سفارتکار ته ویلي چې باید حکومت یې د پاکستاني زده کوونکو تحفظ باوري کړي او په دې لړ کې دې ټول ممکنه ګامونه واخلي.
د پاکستان خارجه دفتر ویلي چې د پاکستان حکومت ګرده نړۍ کې د خپلو وطنوالو د تحفظ او امنیت چارې په سنجیدګۍ سره اخلي او د هغوي د خېر ښېګړې باوري کولو لپاره به ټول ضروري ګامونه اخلي.
Forum