​ د روس په صدارتي انتخاب کې ووټونه شروع شول او یقیني ده چې صدر پوټن به يې وګټي

د روس په صدارتي انتخاب کې د جمعې په ورځ ووټونه شروع شول چې درې ورځې به جاري وي او یقیني ده چې موجود صدر ولادېمېر پوټن به د نورو شپږو کلونو دپاره بیا منتخت کړی شي ځکه چې په مخالفت کې یې څوک مضبوط امیدوار نشته.

په ځینو ځایونو کې په پولنېګ سټېشنونو کې د اړي ګړي پېښې هم وشوې او ځینو کسانو د ووټونو په صندوقونو کې شین رنګ واچولو، چې په ظاهره هغه واقعې ته اشاره وه چې په کې په کال 2017 کې د پوټن مخالف سیاسي رهنما الېکسي نوالني په مخ یو حمله کوونکي د چراثیمو ضد د شین رنګ دوا شېندلې وه.

په صدارتي انتخاب کې به ووټونه په ټول روس او روس په غېرقانوني توګه نیولي سیمو یوکرېن او په انلاین بڼه د اتوار، یکشنبې، د ورځ پورې دوام لري. روس لوی ملک دی او یولس سېمي لري چې وختونه یې بدل بدل دي.

کرېملین یا د روس حکومت وویل پوټن خپل ووټ په انلاین بڼه ورکړو.

د روس صدارتي انتخاب په داسې کې کېږي چې ازادو مطبوعاتو او د انساني حقونو ډلو خلاف ګامونه اخیستل شوي او په نتیجه کې يې د سیاسي نظام واک اختیار د پوټن لاسو ته ورغلی دی.

دا انتخاب په داسې وخت کې هم کېږي چې په یوکرېن کې د روس جنګ دریم کال شروع شوی دی. روس د جنګ په مېدان برتري لري او ور ور پرمختګ کوي. بلخوا، یوکرېن د روس دننه د ډرون حملې کوي او په تور سمندر کې یې د روس جنګي بېړه په دفاع مجبوره کړې ده.

د یوکرېن د سرحد سره نږدې د روس په سیمو کې په بمبارۍ کې د اضافې رپورټونه مخې ته راغلي چې په اړه يط پوټن د جمعې په ورځ وویل د بمبارۍ مقصد مقامي اوسېدونکي ویرول او صدارتي انتخاب ګډوډول دي.

پوټن د امنیت په اړه شورا یا سېکیورټي کاونسل ته وویل د یوکرېن دغه حملې نه مخې او نه به اینده د سزا نه بچ شي.

د روس د سېنټرل الېکشن کمېشن ترمخه، د جمعې په شپه د ووټونو وخت تر ختمېدو پورې د هېواد د رجسټر شویو ووټرانو په دریو کې یوه برخه ووټرانو رای ورکړې وې.

په ووټونو کې د شک یا دا څه خبره نشته چې څوک به يې ګټي.

یو اوویا کلن پوټن د صدارت د پينځمې دورې امیدوار دی او په حقیقت کې یې څوک مخالف نشته. د هغه مخالفین یا خو جلاوطن او یا په زندان کې دي.

د پوټن د ټولو نه زیات مخالف سیاسي رهنما نوالني تېره میاشت په زندان کې مړ شو.

د صدارتي انتخاب په بېلېټ د دریو نورو امیدوارانو نومونه هم دي خو دا علامتي امیدواران ګڼل کېږي چې د کرېملېن د تګلارو حمایت کوي.

مبصرین ډیره توقع نه لري چې د روس صدارتي انتخاب به ازاد او منصفانه وي. څېړونکي وايي د انتخابات ټول عمل د کرېملېن یا د روس حکومت په لاسو کې وي او په خپله خوښه يې په وړاندې بوځي.

یوکرېن او مغربي ملکو د روس غندنه کړې چې صدارتي انتخاب په د یوکرېن په هغو سیمو کې هم کوي چې روسي ځواکونو قبضه کړي دي.

د روس منتشر حزب اختلاف غړي چې د پوټن او په یوکرېن کې د جنګ نه ناخوښه دي په پلویانو یې غږ کړی چې د اتوار، یکشنبې، په ورځ چې د ووټونو اخېرۍ ورځ ده، د احتجاج دپاره راووځي. د مرګ نه مخکې نوالني هم د دغې تګلارې حمایت کړی و.

د نوالني ښځې یولیا نوالني وویل پکار ده چې مخالفین یوځای شي او پوټن ته وښښي چې دوی په لویه شمېره کې موجود دي اود پوټن مخالفت کوي