د خالي یا شنبې په ورځ امریکايي پوځ ویلي په افریقايي هیواد صومالیه کې يې په هوايي بریدونو کې د تندروه الشباب ډلې لږ تر لږه ۸ وسله وال وژلي. د بیان تر مخه په دغه برید کې وژل شوي ټول تنان وسله وال وو.
بیان زیاتوي د موغادیشو سره نژدې د صومالیه په ګندرسی ساحلي سیمه کې دغه برید د صومالیې د حکومت په مرسته تر سره شوی.
په روان کال کې د صومالیه په بیلا بیلو برخو کې د امریکايي پوځ لخوا تر ۴۰ پورې هوايي بریدونه تر سره شوي. په دغو بریدونو کې د الشباب ډلې مظبوط مرکزونه هم په نخښه شوي.
هم د خالي يا شنبې په ورځ د صومالیه په بیدوه ښار کې په دریمه ورځ هم د مظاهرو وروسته اړی ګړی لیدل شوی. دغه مظاهرې د الشباب ډلې یو پخواني ناېب مشر مختار روبوو د نیول کیدو پرضد پېل شوي. مختار روبوو د صومالیه سوېل ختیځ ایالت کې د راروانو صدارتي ټاکنو یو قوي کاندید ګڼل کیږي.
مختار روبوو د زیارت په ورځ د نیول کیدو وروسته موغادیشو ته وړل شوی. د دغې ګام وروسته د هغه پلویان په قهر شوي او مظاهرې یې پیل کړي. د دغه مظاهرچیانو او پولیسو تر منځه اېنښتې هم شوي چې پکې تر دې دمه ۱۲ تنه وژل شوي. په وژل شوو کې د پارلیمان یو غړی هم شامل دی.
د چارواکو تر مخه د دغه مظاهرو وروسته يې تر ۲۰ پورې کسان نیولي.
د بخښنې نړیوالې ادارې اېمنسټي انټرنیشنل په مظاهرو کې د عامو خلکو د وژنې غندنه کړې ده. د ختیځې افریقا لپاره د ادارې ناېب ډاېرکټرې سارا جیکسن په یو بیان کې ویلي د صومالیه او اېتهوپیا امنیتي عسکر دې په بیدوه ښار کې د اولسي وګړو پرضد د تشدد نه ډډه وکړي. او څوک دې هم د خپلو خیالاتو په څرګندولو وه نه وژل شي.
د افریقايي اتحاد عسکرو بیا په یو بیان کې ویلي د دوي عسکرو د مختار روبوو په نیولو او موغادیشو ته په لیږلو کې هیڅ مرسته نه ده کړې. دغه بیان وروسته د هغو رپورټونو راغلی چې د اېتهوپیا عسکر د مختار روبوو د نیولو په عملیاتو کې ککړ وو.
د صومالیه د پارلیمان سپیکر محمد مرسل عبدالرحمان د خالي یا شنبې په ورځ په حکومت غږ کړی چې مختار روبوو دې ازاد کړی شي او په دغه سېمه کې دې انتخابات وځنډول شي. د صومالیه حکومت په روبوو تور لګوي، د سوېل ختیځ ایالت سرښار بیدوه ته يې تندروه اسلامي وسله وال او وسلې بیرته راوړي.
