د ايران سرکاري مطبوعاتو وويل، د ايران صدر ابراهيم رېيسي او بهرنيو چارو وزير حسېن امیر عبداللهيان او نور چارواکي د ګل/دوشنبې په ورځ په شمال لويديځ کې د هيلي کاپټر د غورځېدو د پېښې په ځای کې مړه موندل شوي دي.
ویل شوي، د لټون عملې د ګل په ورځ د غورځېدلي هيلي کاپټر ملبه موندلې ده، ياد هيلي کاپټر چې صدر ابراهيم رېيسي، د بهرنيو چارو وزير او نور چارواکي پکې سپاره وو، پرون د اتوار په ورځ د خراب موسم له امله د ايران د ختيځې يا شرقي صوبې ازربايجان د ورزقان علاقې سره نزدې غورځېدلی وو.
د ایران د سرکاري مطبوعاتو ترمخه، د ايران صدر د ازربايجان د صدر الهام علييف سره د ډېم د پروژې د پرانستې د دستورې وروسته په هیلي کاپټر کې بيرته ستنېدو. د ايران مطبوعاتو ویلي، ياد هيلي کاپټر يو د هغو درېو څخه وو چې د دستورې څخه یې بيرته چارواکي راوړل.
له دې وړاندې نن سهار د ايران سرکاري مطبوعاتو خبر ورکړی وو، د ايراني صدر ابراهيم رېيسي د غورځيدلي هيلي کاپټر ځای معلوم کړل شوی، او د پېښې په ځای "د ژوند کومې نخښې نه دي ليدل شوي"، اې پي خبري ادارې دغه خبر ورکړی وو.
د ايراني صدر هيلي کاپټر چې د بهرنيو چارو وزير او نور ورسره پکې سپاره وو، پرون د اتوار/ يکشنبې په ورځ د ايران شمال لويديځ کې غرييزه سیمه کې غورځېدلی وو. د ايراني هلال احمر/رېډ کرېسنټ سوسايټۍ مشر پير حسېن کوليوند سرکاري مطبوعاتو ته ويلي وو، نن سهار د نمر راختلو سره ژغورونکو د دوو کلومیټرو فاصلې څخه هيلي کاپټر ليدلی، خو هغه نور جزيات نه دي شريک کړي.
د اې پي د خبر ترمخه، نن د ګل/ دوشنبې په سهار د ترکي چارواکو هغه ډرون ويډيو يا فوټېج خپاره کړي، چې پکې په ځنګل کې اور ليدل کيږي او شک څرګند کړل شوی چې دغه د غورځېدلي هيلي کاپټر ملبه ده.
ياده علاقه د اذربايجان او ايران پولې سره خواوشا 20 کلوميټره لرې غرييزه علاقه ده. نن سهار د ايران سرکاري خبري ادارې ارنا ويډيو خپره کړې، او په غره کې ښکاره کړل شوی دغه ځای یې د هيلي کاپټر د غورځېدو د پېښې ځای ياد کړی وو. ويل شوي وو پوځيانو په ځاي ازري ژبه کې ويلي، "دغه ځای یې موندلی دی".
له دغې لږه شېبه وروسته د ايران سرکاري ټي وي خبر ورکړی، "په (هيلي کاپټر) کې د سپرو خلکو د ژوند کومې نخښې نه دي ليدل شوي".
له دې وړاندې د ایران چاوراکو ويلي وو، د ايراني صدر ابراهيم رېيسي د نسکور شوي هيلي کاپټر دپاره د لټون عملیاتو تر ګل/ دوشنبې تر سهار غځول شوي وو. د ايران سرکاري مطبوعاتو د اتوار/ يکشنبې په ورځ ويلي وو، هیلي کاپټر د اذربايجان شرقي صوبې د ورزقان سیمې ته څېرمه د ايران په ختيځ کې د خراب موسم له امله نسکور شوی وو.
ويل شوي، په هيلي کاپټر کې صدر ابراهيم رېيسي، د بهرنيو چارو وزير حسېن امير عبداللهيان، او نور دوه چارواکي - د ایران د اذربایجان شرقي ګورنر او د تبریز د جمعې امام - د اذربايجان-ایران له پولې څخه تبرېز ته ستنېدل، چرته چې دوی د اذربايجان د صدر الهام علييف سره ليدلي او د يو ډېم پرانسته یې کړې وه.
علييف په اېکس (پخواني ټويټر) ویلي، هغه د رېيسي د هيلي کاپټر په نسکورېدو سخت خفه دی، د دعاګانو او مرستو یې ويلي وو.
د ایران سرکاري ټي وي د هيلي کاپټر د ژغورنې دپاره ورغلو عکسونه خپاره کړي وو چې په تياره او باران کې په غرييزو سيمو کې د نسکور شوي هيلي کاپټر د ځای موندلو هڅه کوي، خو د رېيسي، امير عبداللهيان او نورو چارواکو په اړه څه نه وو ويل شوي.
د بحران د انتظام دپاره يورپي کمشنر جېنز لينارسک په اېکس ويلي وو، د ايران د مرستې د غوښتنې په ځواب کې یې د سيټلايټ د نقشې د ټکنالوجۍ بېړني انتظام کوپرنيکس فعاله کړی دی. د ايران ايين يا اساسي قانون وايي، که صدر مړ کيږي او يا نااهله يا بې صلاحيته کيږي، مرستيال صدر به یې ځای نيسي څو پورې چې په 50 ورځو کې نوی صدر نه وي ټاکل شوی، دا وخت د ايران مرستيال صدر محمد مخبر دی.
د ایران صدر د سپريم مشر ايت الله خامنه ای ماتحته دی د چا په لاس کې چې د ملک ټول چارې دي.
رېيسي د سخت دريځه خامنه ای د ځای ناستي په توګه ليدل کيږي، هغه په 2021 کې صدر منتخب شوی، د هغه مخالفين د انتخاباتو څخه ودرول شوي او کم ووټونه یې ترلاسه کړي وو.
د وي او اې فارسۍ څانګې ترمخه، په ايران کې په مختلفو ځايونو کې په ټولنيزو رسنيو داسې عکسونه خپاره کړل شوي چې پکې د ايران د سخت اسلام خوښي واکمن رېيسې په مړينه خوشالۍ شوي او اورونه بل کړل شوي دي.
په يوه ويډيو کې يوه مېرمن د اتش بازۍ د ځای پېژندګلو د جنوبي تهران کوي. يو بل تن ويلي د ايران په شمال ختيځ کردستان صوبه کې اتش بازي شوې ده. وي او اې په ازاده توګه د دغو ويډيوز تصديق نه شي کولی ځکه د ايران دننه د رپورټنګ يا خبر ورکولو څخه پرې بنديز دی.
له دې وړاندې د اتوار په ورځ د ايران په سرکاري ټي وي ښکاره کړل شوي وو، چې د حکومت پلويان په مختلفو ځايونو کې راټول شوي او د رېيسي په خوندي توګه ستنېدو دپاره دعاګانې غواړي. د ایران سرکاري خبري ادارې ارنا د خامنه ای د قوله ويلي، د ايران ولس بايد اندېښمن نه وي، د هيواد په چارو کې به هيڅ خنډ نه جوړيږي.
ارنا يو عکس هم خپور کړی چې پکې مرستيال صدر مخبر په مشرۍ د کابينې بېړنۍ غونډه کيږي او د هيلي کاپټر د غورځېدو د پېښې وروسته معاملاتو جاج اخلي.
په جرمني کې مېشت ازاد ايراني خبریال او څيړونکي رضا طالبي د وي او اې فارسۍ ټي وي سره په مرکه کې ویلي، که رېيسي مړ شو، د ايران اسلامي واکمن به یې شهيد ګرځوي چې هغه د بهرنيو دښمنانو اسرايل او امريکې د لوبې په پايله کې مړ شوی دی. خو د دې کوم ثبوت نشته.
د امريکې د بهرنيو چارو وزارت وياند ويلي، دوی د ايراني هيلي کاپټر د غورځېدو پېښه د نزدې نه څاري او په دغه اړه یې د نور څه ويلو نه ډډه کړې ده.
Forum