د افغانستان په جنوب کې پروت ښار کندهار کې ځانمرګی بريد شوی، لږ تر لږه درې کسان پکې وژل شوي او 12 نور ژوبل شوي دي.
د مطبوعاتي رپورټونو ترمخه ځانمرګی بريد نن د زيارت- پنجشنبې په سهار د کندهار د کابل بېنک ودانۍ مخې ته شوی دی چرته چې ګڼ شمېر خلک د تنخاګانو اخیستو لپاره را غونډ شوي وو.
افغان رسنيو په کندهار کې د طالبانو د پوليسو د وياند اسدالله مجيد له قوله ویلي، په بريد کې درې ملکي کسان وژل شوي او 12 نور ژوبل شوي دي.
ويل شوي په بريد کې ژوبل کسان روغتون ته منتقل کړل شوي او روغتيايي حالت یې د ډاډ وړ دی.
په سمدستي توګه د بريد ذمه واري چا نه ده منلې.
خو په افغانستان کې د طالبانو په واک کې د راتلو وروسته کابل او د ملک په نورو ښارونو کې د چاودنو او بريدونو زیاتې زمه وارۍ داعش خراسان منلې دي.
په کندهار کې دا چاودنه په داسې وخت کې شوې چې د افغانستان او پاکستان اړيکې ترينګلې دي.
Forum