متحده عرب اماراتو ویلي د یمن د حوثي باغیانو د هغو دوو بېلېسټک مزایلو مخه یې نیولې ده چې د ابوظهبي په لوري وېشتل شوي وو.
د یو ای ايي د دفاع وزارت په يو بیان کې وویل چې د مزایلو باقیات په بې ضرره ډول وغورځېدل او څه نقصان یې و نکړو. وزارت وویل د هر قسم ګواښ مخنيوي ته تیار دی او هېواد د هرقسم حملو نه بچ کولو دپاره به ټول ضروري اقدامات کوي.
تېره هفته د یمن حوثي باغیانو په متحده عرب اماراتو د حملې ذمه واري په غاړه اخیستې وه. په حمله کې په ابوظهبي کې د تېلو یو ډېپو لګېدلی و چې له امله یې درې کسان وژل شوي وو.
په وژل شویو کسانو کې یو د وزیرستان وکړی هم و. یو ای ایي د هغه پوځي اتحاد برخه ده چې د تېرې هفتې د حملې وروسته یې په یمن کې د حوثیانو په یو شمېر هدفونو بمباري کړې ده.
د سعودي عرب حکومتي مطبوعاتو د اتوار، يکشنبې، په ورځ وویل د حوثیانو یو بېلېسټک مزایل د سعودي عرب په جنوب کې غورځېدلی چې له امله یې یو تن زخمي شوی دی.
یادونه: د وي ا وای د دې خبر دپاره څه معلومات د ای پي، ای اېف پي او رویټرز خبري ادارو نه هم اخیستل شوي دي
