لاس رسیدونکی لینک

Breaking News

امریکا او طالبان د افغان امن په موضوع د ماسکو په غونډه کې برخه اخلي


د افغان امن دپاره د امریکې خصوصي استازي زلمي خلیلزاد د پاکستان خارجه وزیر شاه محمود قریشي سره یو ورستی ملاقات

د افغانستان د سولي شورا غړي، د طالبانو استازي، د پاکستان، امریکې او د یو شمېر نورو هېوادونو سفارتکاران په افغانستان د سولې او مفاهمت لارې لټولو په غرض په ماسکو کې د جمعې په ورځ خبرې کوي.

د روس د خارجه وزارت ترجمانې ماریه زخاروه د زیارت، پنجشنبې، په ورځ وویل د ماسکو په غونډه کې د ١٢ هېوادونو استازي برخه اخلي. ناستې ته د سېکنډ ماسکو فورمېټ کنسلټینشنز یا د ماسکو د صلاح مشورې دویم چوکاټ نوم ورکړی شوی دی.

ترجمانې زیاته کړه چې د ماسکو د غونډې مقصد داسې ماحول جوړول دي چې په دوه اړخیزه او گڼ اړخیزه کچه د مذاکراتو دلارې د افغانستان د مسلې زر تر زره حل راویستل شي.

واشنگټن او طالبانو تېر کال د ماسکو په دغه رنگ غونډه کې د گډون نه ډډه کړې وه.

خو د امریکې خارجه وزارت یا سټېټ ډپارټمنټ د شورو، چهارشنبې، په ورځ وویل د افغان حکومت سره په تماس امریکايي استازی به د ماسکو په غونډه کې د مبصر په حېث شرکت کوي او د خبرو جاج به اخلي.

او طالبانو ویلي د قطر د دفتر پنځه کسیزه پلاوی به د ماسکو په غونډه کې گډون کوي.

د پاکستان د خارجه وزارت ترجمان هم د ماسکو په غونډه کې د پاکستان د نمایندگۍ تصدیق وکړو. د وزارت ترجمان محمد فېصل په اسلام اباد کې د معمول خبري غونډې ته د پاکستان د بند څخه د طالبانو د یو مشر ملا عبدالغني برادر د ازادیدو په اړه وویل چې هغه په افغانستان کې د سولي د کوښښونو په ملاتړ کې خوشی کړی شوی دی.

محمد فیصل وویل ملا برادر "په افغانستان کې د امن او مفاهمت کوښښونو ته تحریک ورکولو دپاره ازاد کړی شو." ملابرادر په کال ٢٠١٠ کې د پاکستان په کراچۍ ښار کې نیول شوی و.

او د پاکستان خارجه وزیر شاه محمود قریشي د زیارت، چهارشنبې، په ورځ په ملتان کې خبریالانو ته وویل چې په افغانستان کې د امن په لړ کې پاکستان د امریکې مرسته کوي او په افغانستان کې د امن دپاره د امریکې خصوصي استازي زلمي خلیلزاد د سفر وروسته په دې لړ کې پرمختگ هم شوی دی.

د ماسکو په غونډه کې د افغانستان، پاکستان، امریکا او د طالبانو ترڅنگ چین، ایران، هندوستان، ازبکستان، کرغزستان، تاجکستان، قزاقستان او ترکمنستان هم برخه اخلي.

د افغانستان د سولي عالي شورا پلاوی به د ماسکو په غونډه کې گډون کوي.

د طالبانو ترجمان زبیح الله مجاهد وویل په قطر کې د طالبانو د "سیاسي دفتر" پنځه کسیزه ډله به د ماسکو په خبرو کې شرکت کوی. زبیح الله مجاهد په ټوېټر یو پېغام کې وویل د طالبانو د پلاوي غړي شیرمحمد عباس ستانکزي، مولوي عبدالسلام حنفي، مولوي شهاب الدین دلاور، مولوي ضیاالرحمان مدني او حاجي محمد سهیل شاهین د ماسکو په غونډه کې گډون دپاره روس ته تللي دي.

د روس د خارجه وزارت ترجمانې ماریه زخاروه وویل د غونډې برخه وال به په یو تالار کې د یو میز چاپیره ناست وي او دا د غونډې برخه والو پورې اړ ده چې ایا د یو بل سره نیغ په نیغه خبري کوي او که نا؟

طالبانو په ماسکو کې د افغان حکومت سره د نیغ په نیغه خبرو امکان رد کړی دی.

زبیح الله مجاهد وویل د ماسکو غونډه د بل کوم فریق سره د مذاکراتو دپاره نه ده. طالب ترجمان د ماسکو په ناسته کې د طالبانو د شرکت دفاع وکړه او وې ویل دا به په سفارتي کچه د "اسلامي امارت" دریځ نور هم قوي کړي.

د ماسکو غونډه په داسې حال کې کیږی چې امریکې د طالبانو سره ابتدايي رابطې کړې دي او نژدې موده کې دوو امریکايي استازو، چې پکی زلمی خلیلزاد هم شامل دي، په قطر کې طالب استازو سره لیدلي دي.

XS
SM
MD
LG