د موسم په اړه امریکايي استازي جان کېري د نهې، سه شنبې، په ورځ په بيجېنګ کې د چین خارجه وزیر وانګ يي سره د ملاقات په موقع وویل د موسمي بدلون د مخنیوي کوښښونه د امريکې او چین په همکارۍ زیاتولو کې مرسته کولی شي.
کېري وویل امید کوي چې د موسم په موضوع خبرې اترې به په پراخه کچه د دواړو ملکونو په تعلقاتو کې هم تبدیلي وکړي.
سټېټ ډپارټمنټ یا د امریکې خارجه وزارت وویل کېري د دې خبرې په ضرورت ټینګار وکړو چې چین دې د کاربن او مېتېن ګېسونو د اخراج کمولو دپاره اقدامات ګړندي کړي او د ځنګلونو رقبه دې زیاته کړي.
امریکا او چین دوه داسې ملکونه دي چې د ګرین ګېس تر ټولو زیات اخراج کوي، یعني ماحول ته نقصان رسونکو ګېسونو اخراج يې د نورو ملکونو نه زیات دی.
وانګ وویل د چین دا یقین دی چې دواړه ملکونه د مذاکراتو دلارې د هرې مسلې مناسب حل راوېستلی شي.
کېري د چین وزیراعظم لي کېیانګ سره هم د نهې، سه شنبې، په ورځ ملاقات وکړو. لي وویل امریکې او چین ته پکار دي چې د موسمي بدلون د مسلې د مخنیوي په لړ کې روابط زیات کړي.
د ګل، دوشنبې، په ورځ کېري د چین هم منصب شي ژېنهوا سره ولیدل.
کېري وروستی امریکايي چارواکی دی چې په دي تازه ورځو کې يې د بيجینګ دوره وکړه، د دې باوجود چې د امریکي او چین تعلقات د تاوتریخوالي ښکار دي. د امریکې خارجه وزیر اېنټني بلینکن او د خزانې وزیرې جېنېټ یلن هم په تېرو ورځو کې د چین دورې کړي دي.
یادونه: د دې معلومات د ای پي، ای اېف پي او روېټرز خبري ادارو نه اخیستل شوي دي
