محمد اکرام
امریکا یو وارې بیا د پاکستان په نیوکلیايي وسلو اندیښنې څرګندې کړي او ویلي پاکستان د نیوکلیايي وسلو بیلا بیلو قسمونو جوړولو پرمختګ جاري ساتلی.
د امریکې قامي استخباراتو ډایریکټر ډین کوټس د تېرې نهې په ورځ د نړیوالو خطرو په اړه د کانګریس یوغونډې ته وړاندې کړي یو رپورټ کې ویلي پاکستان د لنډې فاصلې پورې په رسا هدف وېشتونکې میزایل، د سمندري جهاز نه هدف ویشتونکي کروز میزایل او د اوږدې فاصلې پورې هدف ویشتونکي بیلسټک میزایل په شمول د نوي قسم نیوکلیايي وسلو په پرمختګ کار کوي کوم چې د نوموړي په وینا دغه سیمه د نورو خطرو سره مخ کوي.
د پاکستان خارجه وزارت ویاند محمد فیصل نن د امریکا د استخباراتو په دغه رپورټ نیوکې کړي او ویلي پاکستان په دغه رپورټ کې په منفي توګه په نخښه کړی شوی. نوموړي پایه تخت اسلام اباد کې خبریالانو ته ویلي د څه قسم اعتبار وړ خطرې اندازه کې د هندوستان په تېزۍ سره زیاتیدونکونیوکلیايي وسلو په اړه خبرداری ورکول پکاروو.
محمد فیصل ویلي دويي په تکرار سره نړۍ ته دا دریځ وړاندې کوي چې د پاکستان نیوکلياي وسلې د خپل هیواد د دفاع لپاره دي چې په مشرقي پوله پروت دښمن ګاونډې هیواد د جارحیت نه ډک د څه قسم ګام مخه اونیسي.
واشنګټن په خصوصي توګه د پاکستان د لنډې فاصلې پورې ویشتونکو وړو نیوکلیايي وسلو په اړه فکرمندي لري ځکه امریکايي چارواکي ګڼي د پاکستان په پوځي وسله کې ددغه وسلوشاملولو سره په سیمه کې د نیوکلیايي جنګ امکان زیات شوی.
پاکستاني چارواکي وایي د نصر په نوم مشهور نیوکلیايي وسله وړونکی حتف-۹ میزایل به هندوستان د روایتي ځواکونو په محدوده توګه ممکنه ناڅاپي حملې مخه اونیسي.
د پاکستان پوځ تیرکال اعلان کړی وو چې د نصرمیزایل خپل هدف پورې د رسیدو معیار نور هم ښه کړی او دا چې د میزایل د ویشتو فاصله يې د ۶۰ نه ۷۰ کلومیټره ته زیات کړی.
پاکستان کې په نیوکلیايي وسلود یوکتاب لیکوال او څېړنکار شاهدالرحمان وايي پاکستان خپل نیوکلیايي پروګرام کله هم نه دی کم کړی. نوموړي ویلي ترڅوچې ددوي لپاره د هندوستان له اړخه خطرې موجودې وي ترهغه وخت پورې به پاکستان په خپلوعصري نیوکلیايي وسلو کاردوام دارساتي.