د نهې یا سه شنبې په ورځ د امریکا د ۳۹م صدر جیمي کارټر جسد د امریکا په کانګرس ودانۍ کې د احترام د پاره کېښودل شو او د امریکا د قانون جوړونکو لخوا ورته درناوی او احترام وړاندې کړل شو.
د امریکا مرستیالې صدرې کاملا هېرس کانګرس په روټونډا کې د کارټر د کورنۍ غړو او نورو مهمو مېلمنو ته وویل: “نن مونږ د هغه سړي ژوند لمانځو چې کارونه به یې د نسلونو لپاره لارښودنه وي.”
کارټر، چې یو ځل د امریکا صدر جوړ شوې و، د نوبل د سولې جایزه ګټونکی و، او د هغه جسد به د دوو ورځو لپاره په واشنګټن کې د احترام لپاره پروت وي، چې امریکایان ورته خپل درناوی څرګند کړي.
میرمن هېرس د پخواني صدر کارټر د لاسته راوړنو یادونه وکړه، په ځانګړې توګه د کمپ ډېوېډ تړونونو په جوړولو کې د هغه رول، د اخلاقو په اصلاحاتو کې یې ونډه، او د تعلیم او انرجۍ وزارتونو بنسټ ایښودل.
د کانګرس مشرتابه هم د هغه د صدارت دوره یاده کړه، چې د امریکا په تاریخ کې د یو سخت وخت په دوران کې وه.
د هاوس اف رېپرېزېنټېتیوز سپېکر مایک جانسن وویل: “د صدر کارټر ژوند، د هغه بې غرضه خدمت، د کېنسر په وړاندې یې مبارزه، او د خپلو خلکو لپاره د هغه دایمي خدمتونه ټول په ریښتیا د ستاینې وړ دي.”
د سېنټ د لږکیو مشر چک شومر د نهې یا سې شنبې په ورځ د سېنټ کې وویل: “صدر کارټر د هغو کسانو له ډلې څخه و چې د صدارت په څوکۍ یې د بې ساري شرافت او صداقت مثال وټاکه. هغه په هر اړخ کې یو اصولي انسان و: مهربان، دروند، هوښیار، عاجز، او ژور وطنپال و.
د کارټر صدارت دوره (۱۹۷۷-۱۹۸۱) د ویتنام جګړې او د واټرګېټ د رسوايۍ له پایلو وروسته پیل شوه، چې د صدر ریچرډ نېکسن استعفا او د امریکایانو په عامه ادارو د باور کمښت ته یې لاره هواره کړه.
د هغه دوره د ګرانۍ او په ایران او افغانستان کې د کړکېچونو له امله پېژندل کېږي.
کارټر د امریکا تر ټولو صدارانو کې اوږد ژوند درلود، په ۱۰۰ کلنۍ کې وفات شو.
د کانګرس د ودانۍ د معمار په وینا، یوازې ۴۶ کسانو د امریکا د بنسټ له پیل راهیسې د کانګرس په روټونډا کې د احترام په سر ځای نیولی دی. د کارټر جسد به د زیارت/ پنجشنبې په ورځ د هغه خپل اصلي ایالت جورجیا ته ولېږدول شي، چیرته چې به یې په شخصي کورني مراسمو کې خاورو ته وسپاري.
Forum