امریکايي چارواکي وايي په پاکستان باندې د امریکا د مرستو له بندیدو سره سره د پاکستان په چلند کې بدلون نه دی راغلی.
د امریکا د بهرنیو چارو وزارت یو لوړ پوړي چارواکي، مرستیال سکرټر جان سولیوان د سنا د بهرنیو چارو کمېټې ته د وینا پرمهال وویل، پاکستان کافي داسې څه نه دي کړي چې مونږ ورته د امریکا لخوا ځنډېدلې مرستې بیرته ورکړو.
نوموړي وویل، امریکا به پاکستان د ترهګرو د پټنځایونو د ردولو له امله مسول وګڼي.
د اورونې پر وخت امریکايي ډپلوماټ وویل، پاکستان د هغو طالب مشرانو په شړلو کې پاتې راغلی کوم چې په افغانستان کې جګړه کوي.
ده زیاته کړه، امریکا هڅه کوي چې طالبان د خبرو میز ته راولي او پاکستان اوس هم دا توان لري چې طالبان د خبرو میز ته کښینوي او امریکا دا هیله لري چې پاکستان دا کار وکړي.
ده دا هم وویل، چې امریکا د ترهګرۍ په وړاندې جګړه کې د پاکستان د هڅو او د خلکو د قربانۍ نه خبره ده خو زیاتوي چې امریکا پاکستان ته په ډاګه ویلي چې باید د ترهګرو ډلو په وړاندې پرېکړنده ګامونه پورته کړي.
جان سولیوان زیاته کړه، امریکا د هغه سیاست مخالفه ده چې له ترهګرو ډلو څخه څوک د نورو هېوادونو پرضد کار واخلي.
امریکايي چارواکي د جنوبي اسیا لپاره د ټرمپ د نوې پالیسۍ په اړه دغه خبرې د امریکا سنا ته په داسې وخت کې کړې دي چې په افغانستان کې په دې وروستیو کې د ترهګرو لخوا په بریدونو کې زیاتوالی راغلی.
د پاکستان وزیر اعظم تېره ورځ بلومبرګ خبري ادارې ته ویلي و، د افغانستان شخړه د پوځي عملیاتو له لیارې نه بلکه له طالبانو سره د خبرو له لیارې حل کېدای شي.
پاکستان تېره اونۍ افغانستان ته یو پلاوی هم استولی و چې د کابل لخوا د هغو اسنادو او شواهدو سپیناوی وکړي چې د افغان پلاوي لخوا په اسلام اباد کې پاکستاني چارواکو ته ورکړل شوي وو.
د ددغو اسنادو او شواهدو له مخې په کابل او یو شمېر نورو ولایتونو کې وروستي ترهګریز بریدونه د پاکستان په خاوره کې پلان شوي وو او ترهګر هم ورته هلته روزل شوي وو.
پاکستان تل دغه ډول تورونه ردوي.