په اسرایل د حماس د حملې وروسته، امریکې او ځینو نورو اتحادي ملکونو يې د حماس د مالي سرچینو مخنیوي او د ترهګرۍ ضد کوښښونو کې یو بل سره مرستې دپاره نړیوال ټاسک فورس جوړ کړی دی.
د ټاسک فورس د جوړېدو اعلان امریکې د ګل، دوشبنې، په ورځ اعلان وکړو.
په اووم اکتوبر په اسرایل د حماس په حمله کې ۱۲۰۰ کسان وژل شوي او د ۲۰۰ نه زیات نور کسان حماس یرغمال نیولي وو. د حملې په جواب کې اسرایل د حماس په ضد په غزه کې عملیات شروع کړي او فلسطيني چارواکي وايي په سیمه کې په زرګونو کسان وژل شوي دي. د ګل، دوشنبې، په ورځ اسرایل او حماس عارضي ډز بندي دوه ورځې وغځوله. د دې نه مخکې اسرایل یو شمېر فلسطیني قېدیان او حماس ځینې یرغمال کسان ازاد کړل.
په اسرایل د حماس د حملې وروسته امریکې ، برطانيې او دوی نورو اتحادي ملکونوکوښښونه شروع کړي چې د حماس د مالي وسایلو مخه ونیول شي. واشنګټن او ځینو نورو حکومتونو حماس ترهګر تنظیم ټاکلی دی.
د امریکې د خزانې وزارت د ټاسک فورس په اړه په یو بیان کې وویل چې د دې دلارې به د مالي چارو په اړه د استخباراتي معلومات شریکول بهتر شي او د دې دلارې به په نورو موقعو او د اضافي ګامونو په اړه خبرې اترې کېدلی شي.
د بیان ترمخه، ټاسک فورس به د فاینېنشل انټېلېجنس یونېټس، اېف ايي یوزو، ترمنځ او د چارواکو او د ولس او د غیر حکومتي سېکټر تعلقات مظبوط کړي چې د خطر د مخینوي په لړ کې په شریکه کار وکړی شي.
په ټاسک فورس کې د اسټرېلیا، کېنېډا، اېستونیا، فرانس، جرمني، اسرایل، لېکټېنسټاین، لکزمبرګ، د نېدرلېنډ، نیوزي لېنډ، سوېټزرلېنډ، برطانيې او د امریکې اېف ايي یوز او نورې یونټې شاملې دي.
په اووم اکتوبر په اسرایل د حماس د حملې وروسته واشنګټن په حماس یو شمېر پابندۍ لګولي دي. امریکې د حماس د سرمایه کارۍ څانګه په هدف کړې، مالي ادارې يې خبرداره کړې او امریکايي چارواکو بهرنیو ملکونو ته د دورو په مهال مالي وسایلو ته د حماس د لاس رسي په اړه خبرې کړي دي.
د امریکې د خزانې وزارت بیان وویل د اکتوبر د اوومې نېټې حملو د ټاسک فورس د غړو ملکونو اېف ايي یوز ته دا بنیادي مشن وریاد کړو چې د ترهګرۍ مالي وسایل معلوم، ګډوډ او مخنیوی يې وکړي.
Forum