د امریکې د استخباراتي ادارو مشرانو د کانگرس یوې ډلې ته ویلي روس د انټرنیټ دلارې د کال ٢٠١٦ م په صدارتي انتخاباتو کې لاس وهنه کړې ده.
د استخباراتي ادارو مامورینو سینټ یا د کانگرس د ایوان بالا د فوجي چارو یا د ارمډ سرویسزکمیټۍ ته وویل داسې ښکارې چې د امریکې په انتخاباتو باندې د انټرنیټ دلارې د حملو منظوري په لوړه کچه روسي چارواکو ورکړې وه.
خو نو منتخب صدر ډانلډ ټرمپ چې د جنورۍ د میاشت په شلمه نیټه به د خپلې چوکۍ سوگند پورته کوي، په انتخاباتو کې د روس د لاس وهنې په خبره شک کوي. د نهې، سه شنبې، او د شورو، چارشنبې، په ورځ په ټویټر خپلو پیغامونو کې ډانلډ ټرمپ وویل د امریکې استخابارتي اداره سي ايي ای، د هیواد دننه د تحقیقاتو اداره ایف بي ايي او نورې اړونده حکومتي ادارې په هیکنگ کې د ماسکو د مداخلت څه ثبوت نه لري.
خو د نیشنل انټیلیجنس ډریکټر جیمز کلیپر د ښاغلي ټرمپ د څرگندونو سره اتفاق نه کوي. جیمز کلیپر د سنیټ کمیټۍ ته وویل پالیسي سازان او په خصوصي توگه تر ټولو مشر پالیسي ساز کولی شي چې استخباراتي معلومات د صحت مندانه تنقید سره مخاخ کړي خو هغه زیاته کړه په تذلیل او په مثبت تنقید کې فرق دی.
د نورو استخباراتي ادارو مشران هم په دې خبره متفق وو چې روس په نومبر کې د امریکې د صدارتی انتخاباتو نه وړاندې د ډیموکریټک پارټۍ دستاویزاتو ته د هیکنگ یا په غیرقانوني توگه لاس رسايي کړې وه چې راز يي ویکي لیکس نومې ویب پاڼې افشا کړو خو نیشنل انټیلجنس ډریکټر جیمز کلیپر وویل په ووټونو ددې راز د افشا کیدو د اثر اندازه لگول گرانه ده.
د روس نه علاوه ښاغلي کلیپر وویل چین هم د امریکې خلاف سائیر ایسپیناج یا د انټرنیټ دلارې جاسوسي کړې ده خو په کال ٢٠١٥ کې په دې لړ کې د دواړو هیوادونو ترمنځ د یوې معاهدې ورسته په دې کمی راغلی دی.
صدر براک اوباما استخباراتي مامورینو ته امر کړې چې د کال ٢٠٠٨ راهسې شوو صدارتي انتخاباتو ته کتنه وکړي چې روس خو پکې لاس وهنه نه ده کړې. د ډیموکریټک پارټۍ سره تعلق لرونکې براک اوباما په وړمبي وار په کال ٢٠٠٨ کې صدارتي ووټونه وگټل.
د سنیټ د ارمډ سرویسزکمیټۍ مشري د ریپلیکن پارټۍ سنیټر جان میکین کوي. هغه وايي پکار ته ده چې روس ته د هیکنگ جواب ورکړی شي. هغه وايي دا هیکنگ د ماسکو د طرفه د واشنگټن خلاف د جنگ یو اقدام دی.
خو صدر منتخب ډانلډ ټرمپ چې هم د جان میکن په رنگ د ریپلیکن پارټۍ سره تعلق لري په مستقل ډول د روسي صدر ولادیمیر پوټن ستاینه کوي. ډانلډ ټرمپ د ولادیمیر پوټن په دې هم ستاینه کوي چې د صدر براک اوباما د روسي سفاراتکارانو د واشنگټن نه ویستلو په جواب کې يي امریکايي سفاراتکاران د ماسکو څخه نه دي ویستلي.
ډانلډ ټرمپ په خپله کابینه کې د خارجه وزیر یا فارن سیکیرټري د منصب دپاره ریکس ټیلرسن نامزد کړی دی چې ولادیمیر پوټن سره د نژدې تعلق لري او په روس کې يي درنه سرمایه کاري کړې ده.
