په تېرو څو میاشتو کې په لومړي ځل د امریکې د دفاع وزیر لواېډ اسټن او د روس د دفاع وزیر سرګی شوېګو د جمعې په ورځ په اوکراین کې د جنګ په اړه په ټېلې فون خبرې وکړې.
د امریکې د دفاع وزارت، پېنټګان ترمخه، لواېډ اسټن په دې خبره ټینګار وکړو چې په اوکراین کې د جنګ باوجود دې د رابطو لارې خلاصې وساتل شي.
د روس حکومت، کرېملن وویل دواړو خواو د امن او امان په نړیوالو مسلو او په اوکراین کې په صورتحال خبرې وکړې.
د امریکې او روس د دفاع وزیرانو د دې نه مخکې د می په 13 نېټه خبرې کړې وې او لواېډ اسټن په اوکراین کې د جنګ بندۍ غوښتنه کړې وه.
د اسټن او شوېګو تازه خبرې اترې په داسې حال کې وشوې چې کرېملېن دا څرګندول غواړي چې خبرو اترو یې لاره خلاصه کړې ده.
د کرېملن ترجمان دمتري پېکسوف د جمعې په ورځ خبریالانو ته وویل چې د روس صدر ولادېمیر پوټن د شروع راهسې مذاکراتو ته تیار دی.
پېسکوف وویل په اوکراین کې د "خصوصي پوځي اپرېشن" د شروع کېدو نه مخکې هم پوټن د امریکې او نېټو سره خبرو شروع کولو ته تیار و. روسي چارواکي په اوکراین د روس یرغل د پوځي عملیاتو په نوم یادوي.
هم د جمعې په ورځ د ترکي صدر رجب طیب اردوان هم د مذاکراتو په اړه امید څرګند کړو او ویې وېل صدر پوټن "ډیر نرم" او خبرو ته "ازاد" لیدل کېږي.
د امریکي او نېټو چارواکو ویلي چې په اوکراین کې جنګ زر تر زره هغه وخت ختمیدی شي چې پوټن د اوکراین نه روسي ځواکونه وباسي، خو پوټن تراوسه د دې نه ډډه کړې ده.
مغربي چارواکي وايي چې د مفاهمت شرایط باید چې د اوکراین دپاره هم د منلو وړ وي. اوکراین ټولې سيمې بېرته اخیستل غواړي چې روس نیولي، چې پکې د کرایمیا علاقه هم شامله ده. روس په 2014 کې کرایمیا ضم کړې ده.
ماسکو تېره میاشت د اوکراین څلور علاقې د ځان سره ضم کړي او د بېرته ورکولو نه یې انکار کړی دی.
د اوکراین صدر ولادیمیر زېلېنسکي ویلي ترڅو چې صدر پوټن په حکومت کې دی د ماسکو سره به مذاکرات و نه کړي.
د امریکې خارجه وزیر اېنټني بلېنکن د جمعې په ورځ د فرانس هم منصبې کېترین کلونا سره مشترکه خبري کانفرنس ته وویل داسې څه نخښې نښانې نه ویني چې صدر پوټن په "با معنا سفارتکارۍ" کې ښکېلېدل غواړي.
بلخوا د اوکراین ځواکونو وویل د جمعې په ورځ یې په خېرسن سیمه کې د روسي ځواکونو په مقابل کې ګټې ترلاسه کړي دي.
یادونه: د دې خبر ځینې معلومات د وي او ای خبریالانو مارګرېټ بشیر، کارل باب او د ای پي، ای اېف پي او روېټرز خبري ادارو نه اخیستل شوي دي
