د افغانستان او پاکستان ترمنځ د تورخم په پوله پرون د اتوار/ يکشنبې په ورځ د پاکستاني ادارو اېف سي (ملېشې ځواک) او اېف آی اې (مرکزي تحقيقاتي ادارې) کارمندانو يو بل وهلی ټکولی، د رپورټونو ترمخه د 13 پورې غړي پکې ژوبل شوي، او د تورخم پوله د څو ساعتونو دپاره تړل کېدو وروسته بيا پرانستل شوې وه.
په ټولنيزو رسنيو د يادې پېښې ويډيوز خپرې شوي چې پکې ليدل کيږي کسان يو بل وهي ټکوي. په پوله موجود د اېف آی اې يو چارواکي د نوم ښکاره کولو په شرط وي او اې ډيوه ته ویلي، د اېف آی اې او اېف سي کار مندانو ترمنځ نښته په کار کې د مداخلت په سر شوې ده. هغه ويلي، "اېف سي والو د اېف آی اې په کار کې مداخلت کولو، ځکه یې ترمنځ نښته شوې ده".
د رپورټونو ترمخه اېف سي د نښتې په اړه ویلي، "د اېف آی اې او اېف سي د کارمندانو ترمنځ نښته د ګڼې کمولو په سر شوې ده. بيا د دواړو ادارو چارواکو معامله هواره کړې ده".
په افغانستان کې د واکمنو طالبانو د ننګرهار د رسنیو دفتر ویلي، "د پاکستاني لوري د خپلمنځي شخړې له امله د تورخم دروازه د د درې ساعته ځنډ وروسته پرانستل شوې وه".
پاکستاني خبريال حامد مير په اېکس (پخواني ټویټر) پوسټ کې ویلي، "په رشوت کې برخه ولې نه راکوئ؟ د روژې په میاشت کې په تورخم پوله اېف آي اې او اېف سي والا په خپل مينځ کې په جګړه شوي ځکه امېګرېشن ته برخه نه ورکوي، د فارم 47 په ګټه د د دروغو رښتياو خبرو او مختلفو سياستوالو بيانونو د بډو خورو په لړۍ کې نوره اضافه کړې ده".
په پوله د پېسو اخستو خبره يو بل خبريال افتخار فردوس هم کړې ده. هغه ويلي، " 14 ادارې په پوله په ځای کړل شوي دي دوی په يو بل نظر ساتي چې څوک څومره پېسې اخلي، بيا په يو بل د پېسو اخستو تورونه هم لګوي".
په کال 2016م کې هم په بلوچستان کې د پاکستان او افغانستان تر منځ د تګ راتګ په لارو باندې د قاچاق او بډو رشوتونو په سر د پاکستان د پوځ شپږ لوړ پوړي افسران د دندو څخه لرې کړل شوي وو. د نيويارک ټايمز ورځپاڼې په خبر کې ويل شوي وو، د پاکستان د پوځ د پخواني مشر جنرل راحيل شريف په وخت کې يو لفټننټ جنرل، مېجر جنرل، درې بريګيډيران او يو کرنل په بډو رشوتونو او قاچاق کې ککړ معلوم شوي وو.
د دندو څخه په لرې کړل شوو کې د دوو لوړ پوړو افسرانو پېژندګلو د لفټننټ جنرل عبېدالله خان خټک او مېجر جنرل اعجاز شاهد په نومونو شوې او دوی د افغانستان سره په پوله بلوچستان صوبه کې د فرنټير کارپس (اېف سي) مشران پاتې شوي وو.
په خبر کې د يو چارواکي له قوله ویل شوي چې جنرل شاهد د کسټم د ډيوټۍ ورکولو بغېر يو سپورټس موټر په قبضه کې اخستی وو. بيا يو کرنل او مېجر د ګاډي په پېښه کې هغه وخت مړه شوي چې د جنرل په خواست یې اخستی ګاډی په ټکر کړی وو چا چې د پېښې پټولو هڅه کوله. د کرنل ښځې بيا د پوځ مشر ته خط ليکلی، چا چې په بلوچستان صوبه کې د پوځي اهلکارو د غبن يا بډو رشوتونو د ښکاره کولو د پلټنو حکم کړی وو.
د خېبرپښتونخوا د تورخم او بلوچستان د چمن پولې د افغانستان او پاکستان ترمنځ د هر ډول تګ راتګ دپاره غټې لارې دي، چې پېدل پرې خلک اوړي راوړي او د سوداګريزو ګاډو تګ راتګ پرې هم کيږي. په يادو پولو د پېسو په سر د قاچاق تورونه هم لګول کيږي. په پوله اکثره پاکستان ته راتلونکي افغانان تور لګوي چې د دوی سره پاکستان ته د راتګ ټول قانوني اسناد وي خو بيا ترې هم په پوله پېسې غوښتل کيږي.
افغان خبريال سميع يوسفزي په اېکس پوسټ کې ويلي، "د تورخم په پوله د پاکستان اېف سي او اېف آی اې په خپل مينځ کې په جګړه شوي چې افغانان به څنګه لوټو. په خدای قسم، د دې پورې چې پاکستاني ويزه لرونکي هم د اېف سي، اېف آي اې او اېن اېل سي لخوا د پېسو نه ورکولو په سر تنګول کيږي او افغانانو ته په دروازه د اورېدو اجازت نه ورکوي".
پاکستانۍ خبريالې غريده فاروقي په اېکس ويلي، "د تورخم په پوله د اېف آی اې او اېف سي د اهلکارو ترمنځ خبرې اړول شوي او يو بل زخمي کړی، لوړ پوړو چارواکو سمدست د پېښې خبر اخستی او هواره کړې یې ده. د پېښې په شا اصل خبره دا يقيني کول وو چې څوک ترهګر او يا غېرقانونه تن په پوله را داخل نه شي".
پاکستاني چارواکو د تورخم په پوله د پېښې په اړه په رسمي ډول څه نه دي ویلي.
Forum