په افغانستان کې واکمنو طالبانو د پاکستان د پوځ دعوې غېر زمه وارانه او له حقيقته لرې ګڼلې دي. د پاکستان د پوځ وياند پرون په يو خبري کانفرنس کې دعوه کړې وه، د "د تحریک طالبان پاکستان (ټي ټي پي) ترهګر د افغانستان د خاورې نه پاکستان کې ترهګري کوي".
په افغانستان کې د واکمنو طالبانو د دفاع وزارت وياند عنايت الله خوارزمي په اېکس (پخواني ټويټر) د پاکستان د پوځ وياند مېجر جنرل احمد شریف چودري بيان ته په غبرګون کې ويلي، "د پاکستان د پوځ د ویاند وروستۍ ادعاوې بې مسؤلیته او له حقیقت څخه لرې دي".
هغه زياته کړې، د خېبرپښتونخوا په يوه داسې سيمه کې، چې "د پاکستان د پوځ د کلک امنيت لاندې ده، د چينايانو وژل کېدل د پاکستاني امنيتي ارګانونو کمزوري او یا هم له حمله کوونکو سره همکاري په ډاګه کوي".
د پاکستان د پوځ وياند په خبري کانفرنس کې، په 26م مارچ د خېبرپښتونخوا په بشام کې په چينايي انجينيرانو د حملې په اړه ويلي وو، "په دغه بريد کې پينځه چينايي او يو پاکستانی وژل شوي او د دغه بريد منصوبه بندي هم په افغانستان کې شوې، خودکش بمبار هم افغان وګړی وو، پاکستان د دغو پېښو په کلکه غندنه کوي".
طالبان وايي، "د دا ډول پېښو د پړې ګوته افغانستان ته نیول د موضوع له حقیقت څخه د توجه اړولو ناکامه هڅه بولو او په کلکه یې ردوو".
احمد شریف چودري ويلي، "پاکستان د طالبانو د حکومت په نړيواله کچه هر ډول مرسته کړې خو طالبانو چې په دوحه کې کومې وعدې کړې په هغې یې تراوسه پورې عمل نه دی کړی، په دغه معاهده کې ښکاره ليکل شوي چې د افغانستان خاوره به د کوم ملک خلاف نه کاريږي خو کلک شواهد موجود دي چې د ټي ټي پي ترهګر د افغانستان خاوره کاروي په دغه لړ کې د پاکستان د بهرنيو چارو وزارت احتجاج هم کړی او د پوځ مشر پرې تحفظات هم څرګند کړي دي".
خو طالبانو بيا تور لګولی، "موږ د داعش خوارجو ګڼ موارد لرو چي د پاکستان خاورې څخه افغانستان ته را اوښتي، د هغوی خاوره زموږ په ضد کارول شوې او پیښي له هغه هیواد څخه تنظیم کیږي چې پاکستان یې باید په اړه ځواب ووايي".
پاکستان د طالبانو دغه تور ته سمدستي ځواب نه دی ويلی.
پاکستان د اوږدې مودې نه تور لګوي، چې د کله نه طالبان په افغانستان واکمن شوي په پاکستان کې ترهګري او ناامني سېوا شوې او د افغانستان خاوره د پاکستان پرضد د ترهګرۍ دپاره کاريږي. خو په افغانستان کې واکمن طالبان تل د پاکستان دا تورونه ردوي او وايي د خپل امنیت زمه واري دې په دوی نه ور اچوي.
په افغانستان کې د طالبانو د واکمنۍ نه مخکې به د افغانستان حکومت او امریکې تورونه لګول چې پاکستان په خپله خاوره هغو وسله والو ته پناه ورکړې کوم چې په افغانستان کې ترهګري کوي خو پاکستان به تل دغه تورونه ردول.
د امریکا پخواني صدر ډانلډ ټرمپ په خپله د کال 2018م د جنورۍ په لومړۍ نېټه په اېکس (پخواني ټويټر) پوسټ کې ویلي وو، " پاکستان د امريکا څخه 33 اربه ډالره مرستې اخستي خو په بدل کې يې ورته دروغ ويلي او په خپله خاوره يې ترهګر ساتلي دي".
خو پاکستان تل ويلي، په خپله خاوره يې د ټولو ترهګرو تندلاروډلو پرضد بې توپيره عمليات کړي دي.
Forum