د پاکستان سندهـ صوبې د خېرپور سيمې په ناتهن شاه بائي پاس سړک باندې د واده د جنج په يو بس د بجلۍ د هائي وولټېج تار راغورځېدلی چې له امله يې د جنجيانو په ډک بس اُور لگېدلی ، پوليس وايي پېښه کې ۱۱ کسان وژل شوي او ۳۴ نور ژوبل شوي دي .
راپورونه وايي په وژل شوؤ کې اووه زنانه او درې ماشومان هم شامل دي ، د جنجيانو بس په داسې مهال د پېښې ښکار شوی چې جنج واپس روان ؤ .
د راپورونو ترمخه پېښه کې ناوې او د واده هلک (ناوک) روغ پاتې شوي ځکه چې هغه په بيل گاډي کې سواره وو .
پېښه کې ژوبل کسان مختلفو روغتونونو ته وړل شوي ، او راپورونه وايي په اُور سوځېدلو ژوبلو کې د زياتره کسانو روغتيايي حالت مرگونی دی .
صدرممنون حسېن او وزيراعظم نوازشريف په پېښه افسوس څرگند کړی او ژوبلو ته يې د غوره طبي اسانتياؤ ورکولو هدايات ورکړي دي .
پاکستان کې وخت په وخت ټريفکي پېښې رامنځته کيږي ، خو دغه پېښه د اندېښنې وړ گرځولی شي ځکه چې په سړکونو زياتره د بجلۍ غټ تارونه تېر شوي دي .
د روان کال په لمړي سر کې هم د کراچۍ ښار نه د سندهـ صوبې شکار پور سيمې ته د مسافرو روان بس د تېلو يو ټېنکر سره په ټکر شوی ، او اُور پرې لگېدلی ؤ چې په نتيجه کې يې خواؤ شاه ۶۲ مسافر وژل شوي وو .
