د پاکستان وزيراعظم نوازشريف نن د شورو په ورځ د ملک اقتصادي مرکز کراچۍ ښار ته رسېدلی ، او هلته ورته د تېزې گرمۍ له کبله د خلکو د مړينې په اړه احوال تېر کړی شوی دی .
د سرکاري ميډيا ترمخه د وزيراعظم په مشرۍ يوه غونډه کې نوموړي ته وئيل شوي چې په کراچۍ کې د تېزې گرمۍ له ۱۲۵۰ کسان مړه شوي ، او گرمۍ ځپلي ۶۵زره کسان د ښار مختلفو روغتونونو ته راوړل شوي دي .
په کراچۍ کې د جون د مياشتې د ۱۹م نېټې نه موسم تود شوی او تېزه گرمي شورو شوې وه ، چې په ښار کې د خلکو د مړينې سبب گرځېدلې وه او تر اوسه پورې هم د ښار په مختلفو روغتونونو کې گرمۍ ځپلي خلک داخل دي ، او د مړينو سلسله دوام لري .
وزيراعظم په ښار کې د خلکو په مړينه خفگان څرگند کړی او وئيلي يي دي د ټول ملک اولس د گرمۍ ځپلو سره د همدردۍ اظهار کوي .
وزيراعظم زياته کړې د پاکستان په تاريخ کې د گرمي له امله په دومره غټه کچه د خلکو مړه کېدل غېرمعمولي پېښه ده او هره هغه اداره چې لخوا يې په ښار کې خلکو ته تکليف رسېدلی ، د هغې به پلټنې او پوره حساب کولی شي .
له دې وړاندې د سندهـ صوبې د حکومت لخوا وئيل شوي چې په ښار کې د سختې گرمۍ سره د بجلۍ لوډشيډنگ د خلکو د مړينې سبب گرځېدلی ، او صوبايي حکومت د خلکو د مړينې زمه واري په مرکزي حکومت او د کراچۍ د بجلۍ په محکمه " کی اليکټرک" باندې اچوله .
دغه ډول مرکزي حکومت به د گرمۍ په وجه د خلکو د مړينې زمه وار صوبايي حکومت گرځوؤ .
د کراچۍ په يو شمېرعلاقو کې چې د "کی اليکټرک" لخوا اوس هم غېراعلانيه لوډشيډنگ کيږي ، د بجلۍ د نشتوالي سره خلکو ته اوبه هم نه مېلاويږي او د ستونزو سره مخ دي .
"کی اليکټرک " چې شخصي کمپنۍ ده او کراچۍ ته بجلي ورکوي ، د دغې کمپنۍ لخوا وئيل شوي ؤ چې په ښار کې د فني خرابۍ په وجه زيات لوډشيډنگ شوی او کمپني وايي هڅه کوي چې په ښار کې لوډشيډنگ ونه شي .
