د پاکستان د پوځ مشر جنرال راحيل شريف وئيلي چې د افغانستان د مشرانو او افغانانو په ګډون په دغه هېواد کې د سولې عمل بيا پېل کېدو دپاره سازګار ماحول ضروري دی .
دغه خبره نوموړي د امريکې د استخباراتي ادارې " سي ائي ای " د مشر جان برېنن سره واشنګټن کې د ليدو په مهال کړې ده .
د پاکستان د پوځ وياند لفټننټ جنرال عاصم سليم باجوه په ټويټرباندې يو پيغام کې وئيلي د دواړو مشرانو ترمينځ ليدنه کې د سيمې په حالاتو او امنيت باندې خبرې اترې شوي دي .
هغه وئيلي چې د سي ائي ای ډائريکټر د پاکستان د پوځ لخوا د ترهګرو په ضد د ضرب عضب اپرېشن په نتيجه کې د لاس ته راوړنو ستائنه کړې ده .
جنرال راحيل شريف روانه اوونۍ امريکې ته په پينځه ورځنۍ دروه رسېدلی چرته چې به هغه د امريکې د محکمه دفاع او خارجه چارو لوړو پوړو چارواکو سره ويني .
په کال ۲۰۱۳م کې د پوځ د مشر جوړېدو نه پس د جنرال راحيل شريف دا د امريکې دويمه دوره ده .
د پاکستان پوځ تېر کال د جون په مياشت کې د افغانستان سره په پوله پرته قبائيلي سيمه شمالي وزيرستان کې د ضرب عضب په نوم عمليات پېل کړي وو ، امريکا، غرب او افغانستان په دې نظر ؤ چې دغه سيمه دالقاعده سره اړونده تُندلارو پټ مرکز دی او دغلته يي د پاکستان نه د عملياتو کولو غوښتنه هم کوله .
خو پاکستان به وئيل چې په خپل وخت به ځمکني حقيقتونو ته په کتو دغلته عمليات کوي .
د پاکستان پوځ وايي په ضرب عضب اپريشن کې يې تراوسه پورې د درې زرو نه زيات ملکي او بهر ملکي تُندلاري وژلي دي او په سيمه کې يې د دويې ملا ماته کړې ده .
پاکستان دا هم وايي چې افغانستان ترهګرۍ ته د ماتې ورکولو په لړ کې د پاکستان سره مرسته نه کوي چې له امله يې د ضرب عضب اپرېشن لاس ته راوړنې متاثره کيږي .
پاکستان د افغانستان د روغې جوړې په عمل کې خپل کردار ادا کړی او وايي که کابل وغواړي اسلام اباد په دغه لړ کې کردار کولو ته تيار دی .
د پاکستان په کوربه توب په لمړي ځل د روان کال د جولائۍ په مياشت کې د افغان حکومت او طالبانو ترمينځ خبرې شوې وې چې پکې د امريکې او چين استازو هم ګډون کړی ؤ .
د خبرو دغه لړۍ چې په دويم ځل هم پاکستان کې ټاکل شوې وه د طالبانو د مشر ملاعمر د مړينې د خبر راتلو نه پس وځنډول شوې او د هغې نه پس افغانستان کې د تشدد پېښې هم زياتې شوې وې .
