د پاکستان د پوځ وياند لفټننټ جنرال عاصم باجوه وئيلي په کراچۍ کې د ترهګرۍ په پېښو کې ککړ د القاعده برصغير،لشکرجهنګوي او ټي ټي پي نېټ ورک نيول شوی دی ، نوموړي وئيلي په ښار کې د روانو عميلياتو سره د امنيت وضع ښه شوې او زياته کړې يې اپرېشن به ښار کې د پوره امن په ځاې کېدو پورې روان وي .
د پوځ وياند لفټننټ جنرال عاصم باجوه په کراچۍ کې مطبوعاتي غونډې ته په وينا کې وويل په دغه ښار کې د کال ۲۰۱۴م د ستمبر په مياشت کې د رېنجرو په مشرۍ پېل کړی شوي عمليات چې تراوسه دوام لري ، په دې کې په ښار کې ترهګري کوؤنکې درې مهمې ډلې نيول شوي دي .
دی وايي "زمونږ د څيړونو ترمخه په کراچۍ کې د ترهګرۍ په پېښو کې دوه غټي ډلې القاعده برصغير او لشکرجهنګوي ککړي دي چې د ترهګرۍ څومره غټې پېښې شوي دويې کړي دي او د دويې سره په دغه کار کې د تحريک طالبان پاکستان ډله هم شامله وه" .
هغه وويل د کراچۍ په اپريشن کې دا غټه کاميابي ده چې د دغو درې واړو ډلو جوړ شوي شريک ګينګ کې شامل ۹۷ واړه کسان نيول شوي چې پکې د ۲۶ په سر باندې انعامونه مقرر وو، او دويې قانون فافذؤنکو ادارو ته مطلوب وو .
عاصم باجوه زياته کړه په دغو نيول شوؤ ترهګرو کې د القاعده برصغير امير او نائيب امير د لشکرجهنګوي ډلې د کراچۍ امير او نائب امير ، بمونه جوړؤنکي او شپږ خودکش شامل دي ، او پاتې ۴۷ نور داسي ترهګر دي چې دغو ډلوکارول .
د پوځ وياند وويل دغه پوره ګينګ د کال ۲۰۰۹ نه د ترهګرۍ په پېښو کې ککړ پاتې شوی ، دې ګينګ په لاهور کې مناوا پوليس سټېشن د ائي اېس ائي هېډکوارټر، د اېف ائي بلډنګ او په فېصل اباد کې د ائي اېس ائي په مرکز بريدونه کړي دي .
دغه رنګ دويې په کراچۍ کې مهران ايئربېس او دوه ځله د نيوي په بسونو بريدونه کړي دي ، اسلام اباد کې کامره ايئربېس باندې حمله، سکهر کې د ائي اېس ائي په مرکز او د کراچۍ په هوايي ډګر باندې بريد کې هم دغه ګروپ کړی وو .
نوموړي وويل دغه ګروپ دکراچۍ په مرکزي جېل باندې بريد پلان کړی او د وژل شوي پوليس افسر چوهدري اسلم په په حمله کې هم ککړ پاتې شوی دی .
عاصم باجوه وويل په دغه نيول شوي ګروپ کې د القاعده د برصغيرڅانګې دويم مشر مثنی، د ده سره د لشکر جهنګوي د سندهـ صوبې مشر نعيم بخاري هم شامل دی .
نوموړي زياته کړه کراچۍ ايئرپورټ باندې بريد هم دغو دواړو کسانو جوړ کړی ، د بريد منصوبه په ميران شاه کې جوړه شوې وه او حمله کوؤنکي هم د هلته نه راوستل شوي وو .
د پوځ وياند وويل کامره ايئربېس باندې بريد هم د القاعده يو کس په ميران شاه کې تيار کړی او زياته يې کړه ميران شاه د دويې دپاره مارکيټ جوړ ؤ هلته به تياری کېدو او بيا به استعمال له دغو خلکو راوستل کېده .
عاصم باجوه وويل دغه ګروپ د نورو ترهګرو بريدونو منصوبې جوړولې چې پکې تر ټولو غټه د حېدراباد په جېل باندې بريد کول وو، او د دغه بريد دپاره په جېل باندې د حملو ۹۰ فيصده کار مکمل کړی شوی کوم چې شنډ کړی شو.
" د حېدراباد جېل نه دويې ډينيل پرل کېس کې بند خالدعمرشېخ او په کراچۍ کې کورکمانډر باندې بريد کې ککړ ملزم شهزاداحمد خوشي کول غوښته او د هغې نه علاوه تر ۴۰ کسان دويې په جېل کې دننه وژل او د ۱۰۰ پورې نور خوشي کول هدف وو" .
نوموړي وويل دويې سره په دغه کار کې د جېل يو پوليس او د شپږو خودکش کوؤنکو په ګډون ټول نېټ ورک نيول شوی دی .
عاصم باجوه د دغه ګروپ درې مرکزي کسان ميډيا ته ښکاره کړل او ويې وئيل په دويې کې يو د القاعده برصغيرڅانګې نائب امير مثنی، دويم د لشکرجهنګوي د سندهـ صوبې امير نعيم بخاري او درېم مُنا دی څوک چې د لشکرجهنګوي د کراچۍ نائب امير دی .
پوځي وياند په دغه مهال کراچۍ کې د رېنجرو لخوا د روانو عملياتو تفصيل هم وړاندې کړو .
" د اپرېشن له امله د ترهګرۍ پېښې کمي شوي هدفي وژنې ۷۰ فيصده، ۸۰ فيصده قلنګ او ۹۰فيصده د تاوان دپاره د تښتؤنو پېښې کمې شوي دي ، هغه وويل ډېر کار لا نور هم پاتې دی او زياته يې کړه د پوځ مشر د کراچۍ د اولس سره ژمنه کړې ده چې په دې ښار کې به امن راولي" .
په دغه مهال نوموړي په شمالي وزيرستان کې د ضرب عضب اپرېشن د کاميابو يادګېرنه وکړه او ويې وئيل چې د دغه اپرېشن سره په ملک کې د ترهګرۍ پېښې کمې شوي او د امنيت وضع ډېره ښه شوې ده .
په داسې مهال چې د پوځ وياند په کراچۍ کې د روانو عملياتو په اړه رسنيو ته تفصيلي احوال تېر کړی ، دپوليسو په وينا نن د جمعې په ورځ نامعلومو موټرسائيکل سورو کسانو د ښار په ګلشن اقبال سميه کې پوليس تهاڼه باندې، په کريم اباد سيمه کې د جينکو کالج او نارت ناظم اباد کې د هلکانو د سکول سره نزدې لاسي بمونه ويشتي دي چې په نتيجه کې يې د پوليس په ګډون درې کسان ژوبل شوي دي .