د کراچۍ د دوېمې غټې سمندري اډې پورټ قاسم سپين ږيری خواري کښ حاجي محمد وايي چې د شکاګو د خواري کښو پېښه که د چا نه هېره وي نو نن د پورټ قاسم خواري کښ هغه ياد تازه کوي . ځکه چې د يو خواري کښ جنازه په احتجاجي ناسته کې په سړک دپاسه ادا کړی شوې ده .
د کراچۍ د پورټ قاسم سمندري اډې خواري کښ د بندر نه په ۱۲کلوميټره فاصله په نيشنل هايي وی د ۲۱ ورځو راهسې د خپلو غوښتنو دپاره په احتجاجي پرلت ناست دي .
حاجي محمد وايي وي او ای ډيوه ريډيو سره خبرو کې وويل يوه اونۍ وړاندې د سختې ګرمۍ له امله په احتجاج ناستو خواري کښو کې څو کسان بېحاله شو او روغتونو ته يوړل شو . په دوې کې د اجمل نومې خواري کښ د وينې دفشار زياتېدو له امله د سر رګ وشلېدو او مړ شو .
نوموړي وويل "۴۸کلن اجمل په شپږمه ورځ په روغتون کې ژوند دلاسه ورکړو نن يې جنازه وشوه د کونډې شوې مېرمن، درې ماشومانو زامنو او دوه کم عمره لوڼو سره يې مړی پلارنۍ علاقې د پنجاب صوبې خان پور سيمې ته ولېږل شو" .
د پورټ قاسم خواري کښو وويل نن د مزدورانو نړيواله ورځ نمانځل کيږي، خواري کښو ته د حقونو ورکولو غوښتنې کيږي، او په دغه لړ کې په دولتي او غېردولتي کچ غونډې هم راجوړيږي خو دوې وايي د پورټ قاسم د ۱۸۰۰ نه زيات خواري کښ د ۲۰ ورځو نه په احتجاجي پرلت ناست دي د خپلو حقونو غوښتنې کوي ولې څوک يې غږ نه اوري .
يو بل سپين ګېري ۶۰ کلن خواري کښ صاحب الدين ډيوه ريډيو سره خبرو کې وويل مونږ خپله ځواني په دغه سمندري اډه کې تېره کړې اباده کړې مو ده او نن رانه په بندر د مزدورۍ برتونه خرڅول کيږي، او د روزګار نه مو لاس په سر کوي . دغه مشر غريو نيسي او وايي "حکومت ورسره ظلم کوي" .
د خواري کښو د اتحاديې مشر ګل محمداپريدي وويل حکومتي مشرانو او د سمندري اډو او سمندري جهازونو مرکزي وزير کامران مائيکل سره يې خبرې شوي دي او هغه ورته د دوې د غوښتنو منلو باور ورکړی دی .
"کامران مائيکل راته د مئي د مياشتې پينځمه نېټه راکړې ده دلته به راځي او زمونږ غوښتنې به مني".
اپريدي وويل چې غوښتنې مو نه وي منل شوي او لاسليک راسره نه وي شوی احتجاجي ناستې ته به دوام ورکوو .
د پورټ قاسم سمندري اډې خواري کښ وايي يو ملګري يې په احتجاج کې ژوند د لاسه ورکړو او زياتوي دوې هم د خپلو غوښتنو منلو پورې هرې قربانۍ ورکولو ته تيار دي .
د پورټ قاسم خواري کښ وايي د بندر د دوه برتونو خرڅولو پرېکړه دې بيرته واخستل شي او د کراچۍ د غټ بندر د خواري کښو په رنګ ټول حقونه دې دوې ته ورکړی شي .
د خواري کښو د نړيوالې ورځې په مناسبت صدر او وزيراعظم مزدورانو ته د پوره پوره حقونو ورکولو بيانونه جاري کړي ولې خواري کښ وايي حکومت تل دغسې بيانونه جاري کوي او دمزدورانو د حقونو دپاره عملي ګام نه پورته کوي .
