د پاکستان سندهـ او بلوچستان صوبو کې د بارانونو او سېلابونو له امله رامنځته شوؤ بېلابیلو پېښو کې لږترلږه ۲۱ کسان مړه شوي دي .
د سندهـ صوبې په سرښار کراچۍ کې د جمعې په ماښام باران شورو شوی او د تېرې شپې پورې په دمې دمې سره روان ؤ . د سرکاري میډیا ترمخه په کراچۍ کې د باران له امله د کرنټ لګېدو پېښو کې اته او د کورونو د چتونو غورځېدو پېښو کې درې کسان مړه شوي دي .
د دې ترڅنګ د صوبې په حېدراباد، میرپورخاص، بدین، سکهر او خېرپور ضلعو کې هم د باران سره اړونده پېښو کې پينځه کسان مړه شوي دي .
په کراچۍ کې د جمعې په ماښام د شورو شوي باران چې د خالي د شپې ناوختې پورې روان ؤ اوس هم باراني اوبه په سړکونو او ژورو علاقو کې ولاړې دي . او په ځينې ځایونو کې کورونه ته اوبه ننتوتي دي .
د صوبې اعلی وزیر مرادعلي شاه د خالي په ورځ د ښار ځینو علاقو ته ورغلی د باران له امله رامنځته شوې ستونزې یې معلومې کړي او اړونده ادارو ته يې په سمدستي ډول د اوبو ویستو هدایات ورکړي دي .
بل لور ته په ځینو علاقو کې د بجلۍ نظام هم ګډوډ شوی او د بجلۍ د محکمې (کی الیکټرک) چارواکي وايي د ښار په زیاتو برخو کې يې بجلي سمه کړې او په پاتې علاقو کې پرې کار روان دی .
د بلوچستان صوبې په هرنايي ضلع کې هم د باراني اوبو له امله راغلي سېلاب تېره ورځ د ۲۰ پورې کسان او پینځه ګاډي وړلي وو .
د هرنايي ضلعې د چارواکو په وینا په غرونو د بارانونو له امله جوړ شوي سېلاب په زردالو علاقه کې کسان وړي وو . د چارواکو په وینا سیلاب ۱۵ کسان وړي په هغو کې پینځه مړه شوي او د لسو پورې نور بچ کړی شوي دي .
د موسمیاتو د محکمې ترمخه راتلونکې شواروځ کې هم سندهـ صوبه ، ختیځ بلوچستان د خېبرپښتونخوا ملاکنډ ډویژن او اسلام اباد ترڅنګ د پنجاب صوبې برنو علاقو کې ځاې په ځاې د باران امکان دی .
