ځايي رسنۍ د چارواکو د خلې وايي په کراچۍ ښار کې په وروستيو کې د ترهګرۍ په رامنځته شوؤ پېښو کې د پوهنتونونو زده کوونکي لاس لري.
بل لور ته د سېنېټ چيئرمېن رضا رباني د کراچۍ پوهنتون وايس چانسلر ته خط لېږلی چې پکې نوموړي د پوهنتون د زده کوونکو ريکارډ استخباراتي ادارو ته په سپارلو او د پوليس سرټيفيکېټ جوړولو باندې اندېښنه څرګنده کړې ده.
راپورونه وايي د لويې اختر په ورځ د متحده قامي مومنټ پاکستان ډلې په يو مشر خواجه اظهارالحس باندې د بريد وروستو د پوهنتونونو د زده کوونکو په ترهګرۍ کې د ککړتيا خبره مخې ته راغلې ده.
په کراچۍ کې د ترهګرۍ په پېښو کې د زده کوونکو د ککړتياد خبرو مخې ته راتلو وروستود سه شنبې په ورځ د کراچۍ او اېن اي ډي پوهنتونونو د مشرانو او استاذانو ترمنځ ليدنې او خبرې اترې شوي دي.
راپورونه وايي په دغو ليدنو کې د زده کوونکو د داخلو په وخت د هغو د علاقايي پوليس تاڼې نه سرټيفکېټ اخستل او بيا د زده کوونکو ريکارډ استخباراتي ادارو ته د سپارولو په اړه هم خبرې شوي دي.
ويل کيږي په خواجه اظهار د بريد په مهال ځوابي ډزو کې وژل شوی تن حسان نومېده هغه اعلی تعليم يافته او په انجينيرنګ پوهنتون کې استاذ ؤ.
پوليسو په خواجه اظهار د بريد مقدمه په عبدالکریم او دهغه دوه ملګرو طلحه اومزمل باندې درج کړې ده.
د عبدالکریم په اړه ويل کيږي هغه د کراچۍ پوهنتون د اپلائيډفزکس څانګې اوسېدونکی دی، پوليس د سه شنبې په ورځ د دوه نور کسان نیولو ويلي چې هغويې هم د فزکس د څانګې زده کوونکي دي.
راپورونه وايي په نيول شوؤ کسانو کې د انصارالشريعه نومې ډلې مشر شامل دی.
په کراچۍ کې له دې وړاندې هم په شيعه اسماعيليانو بريد او د ټي ټو اېف په نوم غېردولتي ادارې مشرې سبين محمود په وژنه کې ککړو کسانو کې هم د تعليمي ادارو د زده کوونکو ويل شوي وو.
دغه ډول په حېدر اباد کې د جامشورو لياقت ميډيکل يونيورسټي اف سائنس زده کوونکې نورين لغاري د روان کال فرورۍ په مياشت کې په داعش کې د شاملېدو دپاره تښتېدلې او په لاهور کې بيا نيول شوې وه.
د سېنېټ چيئرمېن د پوهنتون وايس چانسلر ته په خط کې ليکلي نصاب ته دې بيا د سر نه کتنه وشي، او د ځوانانو تُندروۍ پله تلو د مخنيوي دپاره دې اقدامات وشي.
دغه ډول د سېنېټ د قرارداد لاندې دې د زده کوونکو سازمانونه بيا په ځای کړی شي، او د ادبي او تعليمي هلوځلو نه به يو بل دريځ رامخې ته شي.
د جولايۍ په مياشت کې هم د سي ټي ډي پوليس د سندهـ څانګې مشر ډي ائي جي ثناالله عباسي د ۴۰ سرکاري او غېرسرکاري پوهنتونو د مشرانو او چارواکو ترمنځ په يوه ناسته کې په تعلیمي ادارو کې د تندروۍ د مخ په زياتي فعاليتونو خبرې کړې وې.
