د فاټا اصلاحاتو اوخېبرپښتونخوا کې ورګډولو په اړوند د قبايلي سيمو د خلکو او سياسي ګوندونو ګډ احتجاجي لاريون اسلام اباد ته په لار دی.
د باجوړ نه د پارلمان استازي شهاب الدين خان ډيوه ريډیو سره خبرو کې وويل د ټولو قبايلي سیمو او خېبر پښتونخوا نه د سياسي ګوندونو مشران او غړي په لويه شمېره کې اسلام اباد ته ورنزدې شوي دي.
هغه وويل د مولانا فضل الرحمان د ګوند نه علاوه نور ټول سياسي ګوندونه يې په احتجاجي لاریون کې ملاتړ کوي او اسلام اباد ته ورسره روان دي.
د عوامي نيشنل ګوند د مرکزي عمومي سېکتر مياافتخارحسېن په مشرۍ احتجاجي لاريون کې د ګوند غړي ملګرتيا کوي او نوموړي ويلي دوي د قبايلو سره د دوي په احتجاج کې کلک ملګري دي او دوي سره به ټينګ ولاړ وي.
شهاب الدين وویل دوي دغه درې غوښتنې کوي چې پېښور هائيکورټ او سپريم کورټ ته دې د قبايلو رسايي ورکړل شي، د ۲۰۱۸م عامو انتخاباتو کې دې قبايلي سیمو ته د خېبرپښتونخوا اسمبلۍ کې استازيتوب ورکړی شي او اېن اېف سي اېوارډ کې دې فاټا ته پوره برخه ورکړی شي.
هغه زیاته کړه په اسلام اباد کې به احتجاج کوي او د راتلونکې تګلارې دپاره به د ملاتړ کوونکو سياسي ګوندونو سره صلاح کوي او د هغې وروستو به اعلان کوي.
په ټولنيز رسنيو هم د فاټا د احتجاجي لاريون عکسونه خپاره کړی شوي او خلکو د اېف سي ار قانون په ضد پېغامونه ورکوي.
