د افغانستان په شمالي ولایت کندز کې نن د یکشنبې یا اتوار په ورځ د وسلوالو طالبانو په یوه برید کې ۱۳ پولیس وژل شویدي.
چارواکي وايي، په درنو وسلو سمبال ترهګرو د کندز ولایت په خان اباد وسلوالۍ کې د پولیسو په یوې پوستې باندې سهار وختي مهال برید وکړ چې په پایله کې یې ۱۳ تنه پولیس ووژل شول.
په سیمه کې د پولیسو قومندان، حیات الله امیري امریکا غږ ته د قربانیانو د شمېرې د تایید ترڅنګ وویل چې د برید پرمهال په پوسته کې ۱۴ پولیس وو چې یواځې یو تن یې په تېښته بریالی شویدی.
دی زیاتوي، طالبانو د پولیسو وسلې، مهمات او زرې موټرې له ځانه سره وړي دي.
طالبانو د پېښې پړه په غاړه اخیستې او د ۱۷ پولیسو د وژل کېدو دعوا کوي.
د یکشنبې د ورځې دغه برید یواځې یوه ورځ وروسته د غزني ولایت له هغه برید څخه شوی چې په کې نهه پولیس وژل شوي وو.
په روانه اکټوبر میاشت کې د ترهګرو لخوا په افغانستان کې د حکومتي امنیتي ځواکونو پرضد ګڼ بریدونه ترسره شوي چې پکې امنیتي ځواکونو ته درنه مرګ ژوبله اوښتې ده.
تر ټولو خونړی برید د اکټوبر په ۱۷ نېټه په پکتیا ولایت کې شوی وه چې په کې د پولیسو د قومندان په ګډون شاخوا ۶۰ پولیس وژل شوي وه.
تر هغې یوه ورځ وروسته بیا په جنوبي ولایت کې کندهار کې د ملي اردو په یوه مرکز برید وشو او ۴۳ سرتیري په کې ووژل شول.
د اکټوبر په شلمه نېټه بیا په دوو جوماتونو باندې ځان وژونکو ترهګرو برید وکړ چې په کې لږ تر لږه ۷۲ لمونځ کونکي ووژل شول.
په کابل کې د شعیه ګانو په جومات ددغه ترسره شوي برید پړه داعش په غاړه اخیستې وه.
د اکټوبر په ۲۱ نېټه طالبانو په کابل کې د پوځي اکاډیمۍ مخې ته د یوه موټر بم چاودنه وکړه چې په کې ۱۵ کسان ووژل شول.