د خېبرپښتونخوا د اېبټ اباد ضلعې سره تعلق لرونکی د عيسايي ورورلۍ يو مشر پادري کرسټوفرشاکر وايي د دوي د عبادت پينځه چرچونه پولیسو بغېر د کوم خبرداري تړلي دي،خو د ضلعې د پوليس مشر وايي چرچونه يې تړلي نه دي خبرداری يې ورته ورکړی چې رجسټرډ يې کړي.
کرسټوفر شاکر ډيوه رېډيو سره خبرو کې وويل، " دا پينځه چرچونه دي چې ځينې پکې د ۳۵ کالو او ۵۰ کالو نه اباد دي" هغه ومنله
چې دغه چرچونه د کرايۍ په ځايونو کې جوړ کړی شوي وو.
د ضلعې د پوليس مشر (ډي پي او) سيد اشفاق ډیوه رېډيو سره خبرو کې وويل، دوي ته ځينې ځاي کسانو شکايت کړی ؤ چې خلکو په شخصي يا د اوسېدو په عامو کورونو کې پينځه چرچونو جوړ کړي او د قانون ترمخه يې د حکومت نه کومه اجازت نامه نه ده اخستې بيا دغو خلکو ته د رجسټرېشن خبرداری ورکړی شوی دی.
خو شاکر تور لګوي چې د کرايې په ځايونو کې جوړ کړی شوؤ چرچونو ته خبرداری نه دی ورکړی د دغو ځايونو مالکانو ته ويل شوي چې وې يې تړي او د دوي دپاره اوس دغه ځايونه بند کړی شوي دي.
پوليس افسر وايي "دغه جوړ کړی شوي پينځه ځايونه يا چرچونه تړل شوي نه دي بلکې دوي ته د قانون ترمخه خبرداری ورکړی شوی چې دوي په غېرقانونه توګه دغسې کړي او که دغلته څه ډول پېښه هم رامنځته کيږي زمه واري به یې په خپله د دوي په سر وي".
اشفاق وويل د چرچونو جوړؤنکو په خپله منلې چې "هغوي سره کوم اجازت نشته "، نوموړي وويل دغو خلکو ته يې د ۲۵ دسمبر نه ۳۱م دسمبر پورې د عبادتونو کولو اجازه ورکړه خو دا خلک چې بيرته لاړل دوي په ميډيا دغه ډول خبرې پېل کړې.
پوليس افسر دا هم وويل چې په اېبټ اباد ضلع کې د حکومت سره اته چرچونه رجسټرډ دي او دوي ته د کرسمس په موقع پوره سيکيورټي هم ورکړی شوې وه.
نوموړي زياته کړه دا د حکومت پاکستان قانون دی "چې نه يواځې چرچ بلکې د جومات، مندر او که هغه د قاديانيانو جومات خانه ده او که مدرسه ده اول به د حکومت نه اجازت او منظوري اخلي او د هغې وروستو به یې جوړوي".
خو پادري شاکر وايي د پوليس افسر د وېنا ترمخه په صوبه کې په دغه ډول قانون يو چرچ هم نه دی رجسټر شوی.
بل لور ته ډي پي او سيد اشفاق وويل بايد څوک هم د مذهب په نوم بدنامول ونه کړي او حقيقت اووايي.
اېبټ اباد کې دغه خبره په داسې حال کې مخې ته راغلې، چې تېره اوونۍ د امريکې خارجه وزارت ویلي، چې د پاکستان نوم یې په هغه ځانګړي نوملړ کې اچولی چې د مذهب د آزادۍ په اړه به يې د نزدې نه څارنه کيږي.
د امریکې خارجه وزارت ويلي دا فېصله يې د امریکې د نړیوالې مذهبي ازادۍ د کمېشن په وړاندیز کړې ده.
دغه کمېشن ویلي، په پاکستان کې اقلیتونه ځورول کېږي او ریاست پر هغو لاقانونه وژنو غلی پاتې کېږي چې خلک پکې د تندروه کسانو لخوا د مذهب د سپکاوي په تور وژل کيږي.
د بشري حقونو دپاره کار کوونکي او فعال نيوکې کوي چې په پاکستان کې د مذهب د سپکاوي تر لانجمن قانون لاندې اکثره مذهبي اقليتي ډلې او آزادفکره خلک ځورول کيږي او تر ډېره له دې قانون څخه ناسمه ګټه اخیستل کېږي.
