د مارچ ۸مه په نړۍ کې د ښځو د نړیوالې ورځې په توګه لمانځل کېږي، خو د پښتونخوا او قبایلي سیمو زرګونه پښتنې مېرمنې د جګړو له امله بې کوره دي او ګڼ شمېر یې ورکې دي. د پښتون ژغورنې غورځنګ یو مشر علي وزیر په کوټه کې د وکیلانو غونډې ته وويل:
"۳۲۰۰۰ لادرکه پښتانه اوس هم له دوی [استخباراتي او امنیتي ادارو] سره دي، چې په هغوی کې له دیارلس تر ۱۴۰۰ پورې پښتنې ښځې هم شاملې دي"
علي وزیر وایي د کوټې تر جلسې وروسته به د وزیرستان هغه ښځې میندې او خویندې- چې زامن او وروڼه یې ورک او یا وژل شوي دي- له خپلو کورونو را باسي او د پاکستان پوځي چاوڼۍ ته به یې په ننواتې ورولي، چې لادرکه خلک یې ور خوشي کړي:
"موږ به خپلې خویندې او میندې- که ۵۰۰ وې که ۱۰۰۰ وې هر څومره مو چې برابرې کړې- را باسو، په لاسونو کې به ګلدستې ورکوو، د دوی [پوځ] د چاوڼۍ په خوله کې به دغه ګلونه ورته ږدو، چې له تا سره ټوپک دی له موږ سره ګلونه دي او دا مهرباني وکړه موږ د مجرمانو خلاسول نه درته وایو، خو دا خلک د انصاف ادارې ته وړاندې کړه، چې څوک مجرم دی بې شک سزا ورکړه، خو چې مجرم نه دی هغه را خلاس کړه"
د پښتنو پر سیاسي ګوندونو خصوصاً پر ملتپالو ګوندونو نیوکه کېږي، چې په دې یوویشتمه پېړې کې یې هم ښځو ته په سیاست کې ونډه نه ده ورکړې. د پښتون ژغورنې غورځنګ مشران وایي دوی به هڅه کوي، چې په خپله مبارزه کې ښځې هم ورسره ملګرې کړي. علي وزیر وایي:
"باید زموږ کوشش وي چې په دې تحریک کې زنانه وو ته پوره پوره حصه ورکړو، موږ به د خپل کور خویندې، میندې، ورېندارې او تیندارې را باسو او څنګ په څنګ به راسره روانوو"
ټاکل شوې چې د پښتون ژغورنې غورځنګ د مارچ په ۹مه په ږوب، په ۱۰مه په کلا سیف الله او خانوزۍ او ۱۱مه په کوټه کې سترې ولسي جلسې وکړي، چې ویل کېږي د ښځو د ناستې لپاره ځانګړی انتظام شوی دی.
له خلکو غوښتنه شوې ده چې په دغو جلسو کې د خپلو کورنیو ښځو ته هم د ګډون اجازه ورکړي. په کوټه کې د پښتون قامي جرګې لس کسیزه کمېټۍ د پښتون ژغورځنګ غورځنګ د جلسې انتظام کوي. د دې کمېټۍ غړي ارمان لوڼي پر خپل فېسبوک د ښځو د ګډون په اړه لیکلي:
"ټول ولس بايد د 9م مارچ ږوب جلسې ته، د 10م مارچ کلاسيف الله جلسې، د 10م پنځه بجې خانوزۍ جلسې ته او د 11م مارچ کوټې جلسې ته د خپلې کورنۍ ښځې راولي"
د پښتون ژغورنې غورځنګ مشر منظور پښتین (اردو پواینټ) ویبپاڼې ته په خپله وروستۍ مرکه کې ویلي وو، چې په تېره یوه میاشت کې د عامو خلکو په شمول ډېرو پښتنو ښځو هم ورته ډاډ ورکړی، چې د پښتنو د حقونو لپاره به ورسره ګډه مبارزه کوي.
