د خېبرپښتونخوا مردان ضلعې سره تعلق لرونکي د پښتو فلم، ټي وي او سټېج ډرامو ياد هنر مند رياض اختر د ۵۷ کالو په عمر کې په حق رسېدلی دی.
د ارواښاد د کورنۍ په وېنا اختر د لږې مودې نه د ګردو په رنځ اخته ؤ، هغه ته نن سهار تکليف زيات شوی او د مردان مېډېکل کمپلېکس روغتون کې ساه ورکړې ده.
ارواښاد نن په دوه بجې د مردان په شېخ ملتون سيمه کې خاورو ته وسپارل شو.
د پښتو ژبې هنرمندانو د رياض اختر په مړينه د غم څرګندونه کړې ده.
رياض اختر په کال ۱۹۶۰ د جولايۍ په لمړۍ نېټه د مردان په هوتي سيمه کې زېږېدلی ؤ.
ارواښاد ابتدايي زدکړې د پنجاب صوبې د پېنډۍ ښار نه ترلاسه کړې او هغه بيا په کال ۱۹۸۰ کې د پاکستان ټيلي ويژن پېښور مرکز نه د خپل فن رسمي پېل کړی ؤ.
له دې وړاندې رياض اختر په پېنډۍ کې په سټېج ډرامو کې هم د خپل فن څرګندونه کړې وه.
د پاکستان ټيلي ويژن پېښور څانګې لخوا د ارواښاد ډاکټر محمداعظم اعظم ليکلې شوې ډرامې "خاندان" چې ډېره مشهوره شوې اختر په دغې ډرامه کې خوندور کردار ترسره کړی ؤ.
د ارواښاد نارينه اولاد نه ؤ او درې لوڼه يې پاتې شوي چې دوه پکې واده او يوه ناواده ده.
هغه د مردان په شېخ ملتون سيمه کې د کرايې په کور کې اوسېدو او د کورنۍ په وينا يې په غربت کې يې ساه ورکړې ده.
