لاس رسیدونکی لینک

Breaking News

په پېښور کې یو نرښځی له خپل ملګري سره په ډزو وژل شوی


د نهې- سه شنبې په ماخوستن په پېښور کې یو نرښځی او د هغه ملګری ناڅرګندو وسلوالو په ډزو وژلي دي.

د نرښځیانو د اتحادیې مشرې فرزانې دا برید غندلی او وایي که حکومت یې قاتلین ونه نیسي نو دوی به احتجاجونه پیل کړي.

د پېښور د فقیر اباد سیمې یو پولیس مشر طاهر داوړ رسنیو ته ویلي، چې دغه دوه تنه د ښار پر رنګ روډ باندې په یوه رکشه کې سپاره روان وو، چې دوو موټرسایکل سپرو وسلوالو ورباندې ډزې وکړې.

نرښځی او ملګری یې ځای پر ځای وژل شوي او د هغوی مړي د طبي څېړنو (پوسټ مارټم) لپاره د پېښور خیبر مېډیکل کالج ته وړل شوي دي.

پولیس وایي وژل شوی نرښځی دانیال نومېږي چې په چوټکي مشهور وو او ملګری یې اعزاز نومېږي.

که څه هم وسلوال د پېښې له ځایه دستي تښتېدلي دي، خو د پولیسو په وینا چې رکشه چلوونکي یې د موټرسایکل نمبر لیکلي دي او پلټنه یې ورپسې پیل کړې ده.

په پاکستان کې پر نرښځیانو د تشدد او د هغوی د وژنو پېښې عامې دي.

د نرښځیانو د حقونو د اتحادیې د شمېر له مخې په ۲۰۱۵م او ۲۰۱۶م کلونو کې په پاکستان کې ۵۰ نرښځیان وژل شوي دي.

نرښځیان وایي پر دوی د بریدونو په تور تر اوسه هیڅوک نه نیول شوي او نه سزا شوي دي، ځکه خو پر دوی باندې پرله پسې بریدونه کېږي.

XS
SM
MD
LG