لاس رسیدونکی لینک

Breaking News

ايراني ځواکونو په پوله دوه پاکستاني په ډزو وژلي


د بلوچستان صوبې چارواکو ويلي ايراني چارواکو ورته د بنو سره تعلق لرونکو هغو دوه کسانو جسدونه ورسپارلي چې د ايران سرحدي ځواکونو په پوله د اوړېدو په مهال په ډزو وژلي وو.

چارواکو ويلي پينځه ژوندي نيول شوي کسان يې هم ورته ورکړي دي.

د ايران سره په پوله پرتې د بلوچستان ګوادر ضلعې چارواکو ويلي د ايران لخوا ورته د ورکړی شوؤ مړو پېژندګلو د شاه زېب خان او محمد صادق په نومونو شوې او تعلق يې د خېبرپښتونخوا د بنو سيمې سره دی.

د ګوادر مرستیال کمشنر ځايي رسنيو ته ویلي په نيول شوؤ کسانو کې هم د څلورو تعلق د بنو او يو بل د پنجاب سره دی.

نوموړي ويلي په نيول شوؤ کسانو به د پاسپورټ د قانون لاندې مقدمې درج کولی شي.

راپورونه د ايراني چارواکو له قوله وايي چې دغه کسان د بلوچستان د لوري نه په غېر قانونه لار ايران ته ور اوړېدل او په پوله په دوي ډزې شوې او نيول شوي دي.

په سمدستي ډول د دغو کسانو ايران پله د اوړېدو موخه نه ده څرګنده کړی شوې خو د دغه لارې زياتره خلک ايران او بيا يورپ د تلو هڅه کوي.

دا لمړی ځل نه دی له دې وړاندې هم د ايران سره په پوله او يورپ پله په غېر قانونه توګه د تلو په وخت په نورو ځايونو کې هم د خلکو د وژنې او نيولو پېښې رامنځته شوي دي.

داسې هم ويل کيږي چې انساني قاچاقبر هم دغه لارې کاروي او نه يواځې د پاکستان بلکې د افغانستان نه هم ډېری خلک يورپ ته د رسېدو دپاره په دغو ګرانو او خطرناکو لارو تګ کوي.

XS
SM
MD
LG