د افغانستان د ملي کرکټ لوبډلې مشر محمد اصغر خپل تخلص د ستانکزي څخه افغان ته بدل کړی او په برېښنايي پېژندپاڼه کې يې نوم محمد اصغر افغان ليکلی دی.
اصغر په ټويټر د برېښنايي پېژندپاڼې (کمپيوټري شناختي کارډ) عکس خپور کړی دی.
د افغانستان کرکټ بورډ ويلي، د ملي لوبډلې لوبډلمشر به له دې وروسته د محمد اصغر افغان په نوم پیژندل کیږي.
"د افغانستان د کرکټ ملي لوبډلې لوبډلمشر محمد اصغر افغان، چې تر دې مخکې د محمد اضغر ستانکزي په نوم پیژندل کیده، د افغانانو ملي هویت ته د احترام په پار خپل تخلص بدل کړ".
بورډ ویلي، "ښاغلي افغان دا اقدام بریښنایي پیژندپاڼې ته د نوم لیکنې پر مهال وکړ او خپله نوې تذکره یې د محمد اصغر افغان په نوم تر لاسه کړه".
د افغانستان د ملي لوبډلې مشر خوښي ښودلې چې له دې وروسته به د افغان ویاړلې کلمه د هغه د نوم برخه وي او زیاته کړې يې ده،
"د نړی په ګوټ ګوټ کې مونږ ته د افغانانو خطاب کیږي او دا زمونږ ملي وجیبه او وجداني دنده ده چې په خپل هویت وویاړو او د ساتنې لپاره یې کار وکړو".
