لاس رسیدونکی لینک

Breaking News

لومړنۍ پلټنې: د غزني د جګړې مشري پاکستاني پوځیانو کوله خو پاکستان یې نه مني


د پاکستان د بهرنیو چارو وزارت د افغان حکومت د هغو پلټنو پایلې رد کړې چې وايي د پاکستان پوځي افسرانو د اګست په لسمه نېټه نېغ په نېغه د غزني د جګړې مشري کوله.

د افغانستان د کورنیو چارو د وزارت ویاند نجیب دانش نن د زیارت یا پنجشنبې په ورځ د غزني د جګړې په اړه د خپلو پلټنو د لومړنیو پایلو د اعلانولو پرمهال وویل:

"په غزني د طالبانو د اګسټ د لسمې نېټې د جګړې مشري نېغ په نېغه د پاکستان پوځي افسرانو کوله او د جګړې پلان په پاکستان کې د پوځي افسرانو لخوا جوړ شوی وو. "

ده دا هم وویل، چې د غزني په جګړه کې د طالبانو د ماتې له خوړلو وروسته د ګڼو پاکستاني وسلوالو مړي د غزني په کوڅو کې پاتې وو.

ښاغلي دانش زیاته کړه، چې د پلټنو له بشپړېدو وروسته به د پلټنو پایلې له پاکستان سره هم شریکې کړای شي.

د پاکستان د بهرنیو چارو وزارت د افغانستان دغو ادعاو او د پلټنو پایلو ته د تورونو نوم ورکړی.

د پاکستان د بهرنیو چارو وزارت ویاند محمد فیصل په خپلې ټوېټر پاڼې باندې لیکلي:

"دا هغه تورونه دي چې موږ سره یې هېڅ ثبوت نشته او دا د اړیکو د خرابولو لامل ګرځي. موږ غواړو چې مخکې ولاړ شو او مسلې حل کړو."

د پاکستان د پوځ مشر جنرال قمر جاوېد باجوه تر دې مخکې هغه مهال چې پاکستان ته د غزني له جګړې څخه په ګڼ شمېر مړي اړول شوي وو ویلي وو، چې یو شمېر پاکستانيان په افغانستان کې د مزدورۍ لپاره ځي او کیدای شي په دغې جګړه کې دوی هم د نورو افغانانو په څېر وژل شوي وي.

افغانستان ته د جګړو لپاره له پاکستان نه د اورپکو د ورتګ مسله ځینې وخت په رسمي توګه هم تایید شوې ده.

د پاکستان د بې درکه شویو کسانو د پلټنو لپاره د جوړ شوي کمیسیون مشر پخواني قاضي جاوید اقبال د اګسټ په ۲۸ نېټه د پاکستان د سنېټ (سنا) کمېټې ته ویلي وو چې د یو مهم پاکستاني سیاسي مشر دوه ځامن د هغه په وینا " د جهاد لپاره" افغانستان ته تللي.

د غزني له جګړې څخه د پاکستان کومو برخو ته مړي رسېدلي؟

د غزني له جګړې څخه پاکستان ته د اوښتو پاکستانیانو د مړو ګڼ انځورونه او ویډیوګانې هغه وخت په ټولنیزو رسنیو باندې خپرې شوې وې.

په ورته وخت کې د افغانستان په یو شمېر تلویزیونونو کې هم د غزني له جګړې څخه داسې ویډیوګانې خپرې شویدي چې پکې په ظاهره طالب جنګیالي په اردو ژبه د جګړې قومانده ورکوي.

د بیلابیلو سیمو څخه ګڼو سرچینو د خپلو نومونو د نه ښودلو په شرط وي او اې ډیوې ته ویلي وو، چې زیات مړي د پاکستان د جنوبي پنجاب ملتان، دیره غازي خان، بهاول پور، اوکاړه او اندروني سند سیمو ته رسول شویدي چې اکثره یې د پنجابۍ ژبې ویونکي وو.

سرچینو دا هم ویلي، چې د یو زیات شمېر کسانو مړي د پښتنو سیمو لکه بډبېرې، هنګو او ټانک ته هم رسېدلي او داسې راپورونه هم ترلاسه شوي چې د یو شمېر نورو پاکستاني طالبانو مړي لکي مروت، بنو او د جنوبي وزیرستان ځینو سیمو ته رسېدلي دي.

افغان چارواکو ویلي وو چې د غزني په جګړه کې شاخوا ۵۰۰ طالبان او بهرني جنګیالي او نږدې سل تنه افغان سرتیري وژل شوي وو.

XS
SM
MD
LG