د پاکستان د خزانې وزير اسد عمر ويلي چې ملک ته په غېر قانونه لار راغلې پېسې په ترهګرۍ او غېر قانونه هلو ځلو کې کارول شوي دي.
هغه ويلي د (هنډۍ) او (حوالې) د لارې د پاکستان نه د غبن پېسې بهر هېوادونو ته منتقل کړی شوي دي.
د پاکستان د خزانې وزير اسدعمر دغه خبره په داسې حال کې کړې چې د ترهګرۍ د مالي مرستو او غېر قانونه پېسو لېږلو د څار نړیوالې ادارې (فاينانشل اېکشن ټاکس فورس، اېف ای ټي اېف) روانه مياشت له اسلام اباده غوښتي که د خړ فهرست نه وتل غواړي نو د غېرقانونه پېسو د مخې نيولو دپاره به نور ګامونه پورته کوي.
د اېف ای ټي اېف د اسیا څانګې روانه مياشت د پاکستان په سفر کې د اسلام اباد په هغو ګامونه د اطمينان څرګندونه نه وه کړې کوم چې پورته کړی شوي دي.
اېف ای ټي اېف ویلي ؤ په غېر قانونه لار د پېسو لېږلو يا مني لانډرنګ د مخنيوي سره بايد د تجارتي مرکزونو، مذهبي او نورو تنظيمونو د چندو بشپړو ريکارډ وساتل شي او د پېسو د هر قسمه کاروبار ريکارډ هم خوندي شي.
اسدعمر په کراچۍ کې د پانګه والو سره په خبرو کې ویلي، د اېف ای ټي اېف په خړ فهرست کې د پاکستان اچول يوه جدي (سنجيده) مسله ده او زياته کړې يې ده حکومت يې د دغه فهرست نه وتلو دپاره اړین ګامونه پورته کوي.
د خزانې وزير ویلي په ۲۷ هېوادونو کې د پاکستانيانو ۹۵ زره د بېنک اکاؤنټونه مالوم شوي دي،په دوبۍ کې د څلور زره پاکستانيانو جايدادونو مالومو شوي او په نورو هېوادونو کې د ۹۷زره پاکستانيانو جايدادونه په ګوته شوي دي، او ۹۶زره بهر اکاؤنټ لرونکو ته خبرتیا ورکړل شوې ده.
هغه ويلي د غېر قانونه لارې د پېسو د لېږلو د مخنيوي دپاره قانون جوړول کيږي په کوم څه چې ټولې ادارې موافقه دي.
هغه زياته کړې چې د هنډۍ د لارې د پېسو لېږلو او په نورو غېرقانونه طريقو د پېسو کاروبار غټ تاوان اړولی دی.