د صدر ډانلډ ټرمپ د انتظاميې لوړ پوړو چارواکو او په کانګرېس کې د ډېموکرېټ ګوند د استازو ترمنځ د حکومت په تړلو برخو پرانستو خبرې بې پايلې ختمې شوي دي.
د مېکسيکو سره د ديوال جوړولو په لانجه د حکومت ځينې برخې د دوه اوونيو نه تړلی پرتې دي، خو ويل شوي د اتوار په ورځ به په دغه اړوند بیا خبرې کيږي.
صدر ټرمپ د مېکسيکو په پوله د ديوال جوړولو دپاره د پينځه ؤ نه تر شپږ اربه ډالره غواړي خو ډېموکرېټ چې د استازو په اېوان کې ډېر دي روانه اوونۍ يې يوه مسوده منظور کړې خو د ديوال جوړولو دپاره د اضافي پېسو منظوري يې نه ده ورکړې.
ټرمپ ويلي د ديوال جوړولو د پېسو د منظورولو پورې به په دې قانوني مسوده لاسليک نه کوي.
د خالي، شنبې په ورځ غونډه کې د ډېموکرېټس سره خبرې د مرستيال صدر مایک پنس په مشرۍ کې شوي دي.
د سپينې ماڼۍ موقتي چيف اف اسټاف مک ملوني سي اېن اېن ته ويلي، په ليدنه کې کوم خاص پرمختګ نه دی شوی.
د ډېموکرېټ ګوند يو سلاکار چې د ليدنې په اړوند يې مالومات درلوده ویلي يې دي ډېموکرېټ په انتظامیه ټينګار کړی چې د حکومت تړلې برخې پرانيزي.
او تر څو پورې چې حکومتي برخې تړلې پرتې وي د پولې د امنيت په لانجه پرمختګ نه شي کېدی.
د امریکايي حکومت د ځينې برخو تړل کېدو (شټ ډاؤن) له سببه د مرکزي حکومت اته لاکه کارګرو ته اجرت نه ورکړی کیږي.
