لاس رسیدونکی لینک

Breaking News

د سیمې او نړۍ مهم خبرونه


واشنګټن: د امریکا ولسمشر ډانلډ ټرمپ او کانگرس موافقه وکړه چې د دریو اونیو لپاره د امریکا د فډرالي حکومت تړل شوې ادارې بیرته پرانیزي.

په تیرو ۳۵ ورځو کې د امریکا د حکومت د یو شمېر ادارو د بندېدو په ترڅ کې د فډرالي ادارو شاوخوا اته لکه کارکونکي له تنخوا بې برخې وو. خو دا اعلان هم وشو چې د حکومت هغه ټولو کارکونکو ته به تنخواوې ورکول کیږي څوک چې د حکومت د تړل کېدو له امله اغېزمن شوي وو.

که څه هم د امرېکا په تاریخ کې وړاندې هم حکومتونه تړل شوي دي خو په لومړي ځل دا موده د پینځو اونیو نه هم زیاته شوه او له هم دې له امله دا د امریکا په تاریخ کې د حکومتي ادارو د تړل کېدو تر ټولو اوږده دوره وه.

د امریکا ولسمشر ډانلډ ټرمپ د جمعې ورځ په یو خبري کنفرانس کې د فډرال حکومت له کارکوونکو څخه مننه وکړه چې د حکومت د یو شمېر ادارو د تړل کېدو برسېره یې خپلو کارونو ته دوام ورکړی.

--------------

د بشري حقونو نړیوالو ادارو له سعودي عربستان څخه غوښتي چې نړیوالو څارونکو ته دې اجازه ورکړي ترڅو د بشري حقونو د بندي شويو فعالینو د شکنجه کولو د تورونو په اړه پلټنې وکړي.

په منځني ختیځ کې د بخښنې د نړیوالې ادارې (امنیسټې انټرنېشنل) مشر لېن مالوف وویل، د سعودي عربستان چارواکي تل په دې کې پاتې راغلي چې په سمه توګه بندیان وساتي او د هغوی د حقونو په برخه کې خپلواکو څارونکو ته د پلټنو اجازه ورکړي.

همدارنګه په منځني ختیځ کې د بشري حقونو د څار د ادارې (اچ ار ډبلیو) مشر مایکل پېج ویلي، چې په سعودي کې کورني پلټونکي لږ داسې چانس لري چې د بندیانو سره د روان چلند په اړه حقیقتونه ترلاسه کړي.

دواړو ادارو په ځانګړې توګه د بشري حقونو د هغو لسو فعالینو په اړه اندېښنه څرګنده کړې چې په سعودي کې بندیان شوي دي.

په سعودي کې د بشري حقونو د ریکارډ په اړه وروسته له هاغې د نړیوالو لخوا پوښتنې ګروېږنې پیل شوي کله چې په تېر اکټوبر کې د واشنګټن پوست یو لیکوال جمال خاشقجي په استانبول کې د سعودي په کونسلګرۍ کې ووژل شو.

-------------

د یونان وکیلانو له مقدونیې سره داسې یو تړون لاسلیک کړ چې په ترڅ کې یې ددغو دوو ګاونډیو هېوادونو ترمنځ د نږدې دریو لسیزو لانجه پای ته ورسېدله.

ددغه تړون له مخې به د بالکان دغه هېواد د شمالي مقدونیې یا نارت مسیډونیا په نامه یادېږي.

د یونان پارلمان په لږ توپیر دغه تړون د جمعې په ورځ تصویب کړ چې د ۱۴۶ مخالفو رایو په وړاندې ۱۵۳ موافقې رایې وې.

ددغه تړون له مخې به د دواړو هېوادونو ترمنځ اړیکې بېرته سمې شي او همدارنګه مقدونیه به اوس وکولای شي چې له ناټو او اروپايي ټولنې سره یوځای شي.

د امریکا د بهرنیو چارو وزیر مایک پمپیو ددغه تړون د تصویب کېدو له امله د یونان د حکومت ستاینه وکړه او دا یې یو تاریخي تړون وګاڼه.

-----------------

په برازیل کې د اوبو د یو بند د نړېدو له امله اوبه او خټې په شاخوا کلیو باندې اوښتي چې په ترڅ کې یې نږدې ۲۰۰ کسان بې درکه شوي دي.

چارواکي وايي، د سترو سیلابونو په څېر اوبه په نږدې کلیو او ښارونو باندې اوښتي او ګڼ شمېر کسان په سیمه کې بند پاتې دي.

د اور وژنې چارواکي وايي، په ورکو شویو کسانو کې ۱۰۰ تنه حکومتي مامورین هم وه، څوک چې د یاد ډېم په سیمه کې د غرمې ډوډۍ لپاره سره راټول شوي وو.

------------------

د ایټالیا او فرانسې د پولو ترمنځ یو هیلي کوپټر د سیلانیانو له یوې الوتکې سره جنګېدلې او پنځه کسان په کې مړه شوي دي.

د ایټالیا د ژغورنې کارکونکو د پېښې په ځای کې دوه ټپیان هم موندلي دي.

تر اوسه لا څرګنده نه ده چې دغه پېښه څرنګه رامنځ ته شوې ده.

په پېښه کې د قربانیانو د پېژندګلو په اړه تر اوسه څه نه دي ویل شوي.



XS
SM
MD
LG