ټرمپ په دوو جلا ټویټونو کې لیکلي، په افغانستان کې له اتلس (۱۸) کلنې جګړې وروسته خبرې روانې دي.
واشنګټن: د امریکا ولسمشر ډانلډ ټرمپ د شورو یا چهارشنبې په سهار په ټوېټر باندې ویلي دي، چې په افغانستان کې د جګړې د پای ته رسولو لپاره خبرې روانې دي او ژر به څرګنده شي چې ایا دغه خبرې بریالۍ کېږي او که نه؟
"جګړه روانه ده خو د افغانستان ولس د دې نه ختمېدونکې جګړې پرځای سوله غواړي."
د ولسمشر ټرمپ دا ټویټونه د امریکا د ځانګړي استازي زلمي خلیلزاد او د افغان طالبانو د استازو ترمنځ د روانو خبرو په وخت کې کړي دي.
ښاغلي خلیلزاد دوه ورځې وړاندې په لومړي ځل د طالبانو سره د شویو خبرو په اړه ویلي و چې طالبان دې نېغ په نېغه له افغان حکومت سره خبرو ته کښیني.
د خلیلزاد دغه غوښتنه د طالبانو د پخواني دریځ سره په ټکر کې ده، ځکه هغوي تل له افغان حکومت سره له مخامخ خبرو کولو څخه ډډه کړې ده.
څېړونکي وايي، په قطر کې وروستیو خبرو د سولې په اړه هیلې زیاتې کړې دي خو په افغانستان کې د سولې د راوستلو لپاره تر اوسه کومه نېټه نه ده ورکړل شوې.
د ښاغلي خلیلزاد له دغو څرګندونو وروسته افغان ولسمشر اشرف غني یوځل بیا ولس په وینا کې پر طالبانو غږ وکړ چې د دوښمن شوم اهداف دې پرېږدي او له افغان حکومت سره دې نېغ په نېغه خبرې وکړي.
