په کراچۍ کې پرون د جمعې په ورځ د پشين سره تعلق لرونکو پينځه ماشومانو د مړینې وروسته د هغو ترور هم په روغتون کې ژوند د لاسه ورکړی دی، د کراچۍ پوليسو پرون ويلي ؤ ښکاري چې دوي د ناکاره خوړو له امله مړه شوي دي.
پينځه واړه مړه شوي ماشومان تېره شپه کوټې او بيا خپل پلارني کلي د پشين خانوزۍ ته وړل شوي او نن خاورو ته سپارل شوي دي.
د بلوچستان صوبې د پشين ضلعې سره تعلق لرونکې کورنۍ د زیارت په ورځ کراچۍ ته رارسېدلې او شپه يې په سرکاري مېلمستون قصرناز کې وه.
د شپې په مهال د پينځه خوېندو وروڼو کم عمره ماشومانو حالت خراب شوی او روغتون ته وړل شوي او هلته يې ډاکټرانو د مړينې پخلی کړی دی.
په مړه شوؤ ماشومانو کې چې د ټولو عمرونه د لسو کالو نه کم ښودل کيږي درې هلکان او دوه جينکۍ دي.
دغه کورنۍ چې د فېصل کاکړ نومې تن ده، د ماشومانو سره د کاکړ د خور طبعيت هم خراب شوی او هغه هم روغتون ته وړل شوې او بېګاه د شپې ناوخته هغې هم ژوند د لاسه ورکړی دی.
د فېصل د خور مړی لا کلي ته نه دی وړل شوی.
د کراچۍ د پوليسو مشر امير شېخ پرون د جمعې په ورځ رسنيو سره په خبرو کې ويلي ؤ دې کورنۍ د زيارت په ماښام په کراچۍکې د نوبهار نومې رسټورانټ نه برياني (وريژې) راغوښتې او خوړلې وي، او د کوټې نه د کراچۍ په لار يې په خضدار کې هم ډوډۍ خوړلې وه.
هغه ويلي پوليس او د خوراکي توکو د څار ادارې په قصرناز کې د دوي د رسټورانټ د کمرې نه ځينې نمونې اخيستي او د ماشومانو پوسټ مارټم، طبي معاينه هم شوې د دغو رپوټونو مخې ته راتلو وروسته به مالومه شي چې د دوي د مړينې علت څه ؤ.
پوليس او د خوراکي توکو د څار ادارې رسټورانټ تړلی او پلټنې يې پېل کړي دي.
پوليس ويلي په رسټورانټ کې کار کوونکي کسان يې هم نیولي او د هغوي نه هم مالومات کولی شي.