د پښتون ژغورنې غورځنګ (پي ټي اېم) مشر منظور پشتین وايي، "دا چې مذاکرات به د چا سره کوو د دې دپاره به لمړی مونږ د پښتونخوا په هره علاقه کې د خپلو مشرانو ملګرو سره ناسته کوو".
د پي ټي اېم مشر دغه خبره وروستو له هغې کړې چې پرون د نهې، سه شنبې په ورځ يې سره د ملګرو د سېنېټ د قايمه کمېټۍ سره ليدلي وو.
نوموړي د دغه ليدنې وروسته ويلي "د سېنېټ د قايمه کمېټۍ په وړاندې مې خپل دريځ وړاندې کړو او د خپل قام په تحفظاتو مو خبر کړه او په دې ليدنه کې د ټولو سياسي ګوندونو استازي شامل وو".
هغه ويلي دغو خبرو او ليدنې ته "ميډيا د مذاکراتو نوم ورکړی خو دا مذاکرات نه ؤ يواځې د پي ټي اېم او د پي ټي اېم د غوښتنو په اړوند مې بيان کړی دی".
د پي ټي اېم مشر زياته کړې "دا مې په ډاګه کړه چې مذاکرات کله او د چا سره کوو لمړی به د پښتونخوا په هره برخه کې د خپلو مشرانو ملګرو ناسته کوي دا به ټاکي چې په کومو مسلو به د چا سره خبره کوي. زه يواځې نه يم بلکې د ټولو ملګرو سره به مشوره کيږي".
د يادې ليدنې په اړوند د پي ټي اېم مخکښ مشر او د قامي اسمبلۍ غړي محسن داوړ وي او ای ډیوه سره په خبرو کې ویلي، پي ټي اېم ته د سینیټ کمیټې د خبرو بلنه ورکړې وه او د دغه کمېټۍ په غونډه کې د پي ټي اېم ټولې غوښتنې جائز بلل شوي او پرېکړه شوې چې د ترسره کولو دپاره به یې هڅې کولی شي.
هغه ویلي مونږ ته ویل شوي ؤ چې "تاسو راشئ خپله کیسه وکړئ او بیا وړاندې به مونږ ستاسو په غوښتنو کار کوؤ،مونږ ورغلو، درې ساعته اوږدې خبرې مو ورسره وکړې او ټول شیان مو ورته روښانه کړل".
د پي ټي اېم سره د رسمي خبرو دپاره د خېبرپښتونخوا حکومت د قبايلي ضلعو د پارليمان په غړو ګډه مشاورتي کميټي جوړه کړې او پي ټي اېم ته يې رسمي بلنه هم ورکړې ده.
د خېبرپښتونخوا د وزيراعلی مشاور اجمل وزير وايي پي ټي اېم ورته د ۳۱م مارچ نه وروستو د خبرو ويلي ؤ خو د پي ټي اېم مشران وايي دوي د پېښور د جلسې نه وروسته د ميرانشاه د غونډې په کولو کې بوخت ؤ، او ډېر زر به يادې کمېټۍ ته ځواب وکړي.
