د جنوبي کوريا پوځ ادعا کړې چې شمالي کوريا د ايټمي توان د نزدې فاصلې ميزايلو نوې تجربه کړې ده، د جنوبي کوريا د ګډو ځواکونو د مشر ترمخه دا ميزايلې په ختيځ ساحل کې سمندر پله داغل شوي او فاصله يې د ۷۰ نه تر ۲۰۰ کلوميټره پورې ده.
د جنوبي کوريا چارواکو ويلي د امریکا سره په ګډه د شمالي کوريا د نوې تجربې جاج اخلي.
دا تازه تجربه د شمالي کوريا د مشر کم جونګ ان د امریکا د صدر ډانلډ ټرمپ سره د ليدو وروسته شوې ده، کومه ليدنه چې بې د کومې نتيجې پای ته رسېدلې وه.
د پوهانو په نظر د شمالي کوريا دا تجربه د امریکې سره د مذاکراتو د ځنډ ښکارېدو له امله شوې وي.
د شمالي کوريا د تازه تجربو په غبرګون کې د سپينې ماڼۍ پرېس سېکترې ساره سندرس ويلي دوي د شمالي کوريا په دې ګام خبر دي او امريکا يې جاج اخلي.
د امریکې د بهرنيو چارو وزير مايک پمپيو د جنوبي کوريا د بهرنيو چارو وزير سره په خبرو کې په تازه پرمختګ د محتاطه غبرګون څرګندولو پرېکړه کړې ده.
راپورونه وايي مايک پمپيو د جاپان د بهرنيو چارو د وزير سره هم په روانو حالاتو خبرې کړي دي.
جاپان ويلي تراوسه لا نه دي خبر چې د شمالي کوريا د دې اقدام سره د جاپان ملي امنيت ته خطره خو نه ده پېښه شوې.
