په کابل کې د شخصي ټيلي ويژن د کار کوونکو په ګاډي چاؤدنه کې دوه تنه وژل شوي او درې نور ژوبل شوي دي، دغه پېښه د اتوار، يکشنبې په مازيګر ناوخته رامنځته شوې ده.
د افغانستان د کورنيو چارو د وزارت وياند نصرت رحيمي ويلي چاؤدنه د خورشيد ټیلي ويژن د کار کوونکو په ګاډي شوې ده.
چارواکو ویلي په چاؤدنه کې د ګاډي ډرايور او يو لاروی وژل شوي او د ټيلي ويژن د دوه کارکوونکو په ګډون درې نور ژوبل شوي دي.
د چاؤدنې زمه واري چا نه ده منلې.
افغانستان کې له دې وړاندې هم وخت په وخت ژورنالسټان په هدف کړي دي.
تېره مياشت په پکتيا کې د يو رېډيو خبريال نامالومو وسله والو په ډزو وژلی ؤ.
افغان ولسمشر د خورشيد ټيلي ويژن د کار کوونکو په ګاډي بريد په سختو ټکو کې غندلی دی.
