د مايکروسافټ مشر بل ګېټس ويلي په نړۍ کې د پوليو د مخنيوي دپاره هڅې دوامداره ساتي او د پاکستان او افغانستان نه بیرته افریقه ته د پوليو تلو ويره لري.
وايس اف امریکا سره په مرکه کې د نړۍ شتمن بل ګېټس ويلي په افريقه کې پوليو بیا سر راپورته کولی شي او پاکستان په افغانستان کې د پوليو خورولو سبب جوړېدی شي.
نوموړي په پاکستان کې د پوليو مخ په زياتي پېښو په اړوند ويلي په دې لړ کې په وخت د ګامونو اخستو ضرورت دی.
ګېټس دغه خبره په داسې حال کې کړې چې روان کال په پاکستان کې د پوليو د پېښو شمېره ۶۴ ته رسېدلې ده.
د راپورونو ترمخه په افغانستان کې سږ کال تراوسه پورې د پوليو ۱۶ پېښې رپوټ شوي دي.
ګېټس ويلي اداره به يې تر هغې په قلار نه کښېني څو پورې چې په نړیوال کچ د پوليو خاتمه نه وي شوي.
هغه زياته کړې د پاکستان او افغانستان نه د پوليو د (وايلډ وايرس) نوې پېښې مخې ته راغلي دي.
نوموړي ويلي دوي تراوسه خپل کار نه دی بشپړ کړی او د پوليو د خاتمې کار به سرته رسوي.
هغه د پوليو د ختمولو په لړ کې د نايجيريا، د بنګله دېش او هند د ښځو د کردار ستاينه کړې چې ښه رول يې پکې لوبولی دی.
هغه زياته کړې د خلکو سره حکومتونه کولی شي چې د پوليو د مخنيوي په لړ کې کوټلي اقدامات وکړي.