واشنګټن ــــ اېشین ډیویلپمنټ بېنک پخپل تازه رپوټ کې د خپلې اندازې له مخې ویلي، چې په روان مالي کال کې به د پاکستان د اقتصادي ودې شرحه 2.8 فیصده وي، چې وایي دا په جنوبي اېشیا کې تر ټولو ټیټه ده او د افراطِ زر شرحه به یې 12 فیصده وي چې د اتو هېوادونو په کتار کې تر ټولو لوړه ده.
د اېشین ډیویلپمنټ بېنک د 2019م کال سروې رپوټ نن د شورو- چارشنبې په ورځ خپور شوی، چې د پاکستان د اقتصادي ودې د شرحې معلومولو پېشبيني ځنې ایستل شوې ده، خو د افراطِ زر د زیاتوالي په اړه اندازه یې شپږ میاشتې مخکې خپره کړې وه.
اېشین ډیویلپمنټ بېنک یو ځل بیا د عمران خان په مشرۍ د تحریک انصاف ګوند د حکومت پر دویم کال د اقتصادي ځوړتیا په اړه د ټولو اندېښنو څرګندونه کړې ده.
ټاکل شوې چې اېشیایي پرمختیایي بېنک په را روانه نومبر میاشت کې له کلنۍ بودیجې سره د مرستې لپاره پاکستان ته یو ارب او د انرجۍ د ودې لپاره 300 میلینه ورکړي.
په رپوټ کې ویل شوي، د دې اړتیا د پوره کولو لپاره چې پاکستان د کالنۍ بودیجې او بهرنۍ اقتصادي نابرابرۍ ستونځه حل کړي، کېدای شي د کورني پیداوار د ودې (جي ډي پي) له ودې سره- چې روان کال 2.8 فیصده ده- اقتصادي وده نوره هم ورو شي.
اېشیایي پرمختیایي بېنک تر دې وړاندې د روان کال لپاره د پاکستان د اقتصادي ودې شرحه 3.6 فیصده ګڼلې وه.
په رپوټ کې ویل شوي چې د پاکستان پر کورني پیداوار، لوړو ټیکسونو او په ځانګړې توګه د روپۍ د ارزښت د غورځېدو له اثراتو سره په روان 20-2019 مالي کال کې د افراطِ زر کچه 12 فیصده ته لوړه شوې ده.
رپوټ وایي په افراطِ زر کې د 12 فیصده زیاتوالي اندازه تر هغه ډېره لوړه ده چې د روان 2019م کال په اپرېل کې 7 فیصده ښوول شوې وه.
دا په داسې حال کې ده چې د پاکستان تحریک انصاف ګوند حکومت تر له مخه لا د بجلس او ګېس په برخه کې ټیکسونه دوه ځله زیات کړي او د اېشیایي پرمختیایي بېنک د رپوټ له مخې کېدای شي دغه ټیکسونه یو ځل بیا هم زیات کړي.
رپوټ وایي په پاکستان کې د بهرنیو خوراکي توکو، تېلو، سرې او د حیواناتو د خوراکونو د بیو د زیاتوالي یوه وجه د دې هېواد د روپۍ د ارزښت کمېدل دي.
