لاس رسیدونکی لینک

Breaking News

د هند خارجه وزیر: د کشمیر پر سر د هیچا منځګړتوب نه منو


واشنګټن ــــ د هند د بهرنیو چارو وزیر روي شنکر وایي، د کشمیر د شخړې په اړه د هند دریځ له لسیزو راهیسې ډېر څرګند دی او په دې برخه کې د هند او پاکستان تر منځ د هیچا منځګړتوب نه قبلوي.

روي شنکر په نیویارک کې د ملګرو ملتونو په عمومي غونډه کې تر ګډون وروسته د ګل- دوشنبې په ورځ د امریکې پایتخت واشنګټن ته راغلی او د بهرنیو چارو له وزیر مایک پمپېیو سره یې لیدلي دي.

روي شنکر د نهې- سه شنبې په ورځ واشنګټن ډي سي کې د هندي خبریالانو له یوې ډلې سره د لیدو په وخت د کشمیر پر شخړه د ولسمشر ټرمپ د منځګړتوب په اړه د یوه خبریال د پوښتنې په ځواب کې وویل:

"د کشمیر په اړه د هند دریځ له څلوېښتو کلونو څرګند دی چې موږ په دې برخه کې د چا منځګړتوب نه منو او له پاکستان سره په دوه اړخیزه توګه دا شخړه هوارول غواړو".

روي شنکر وویل دا د هند خپله مسئله ده او دوی به یې پخپله حل کوي. وایي دا پرېکړه به دوی کوي چې د کشمیر پر موضوع د چا منځګړتوب ته اړتیا لري که نه:

"په دې اړه هر څوک [د منځګړتوب] وړاندیز کولای شو خو دا پرېکړه به موږ کوو چې که دا وړاندیز اړخ نه لګوي نو دا کار نه شي کېدای".

د هند د بهرنیو چارو وزیر وایي، په نیویارک کې د ملګرو ملتونو د عمومي غونډې په مهال یې چې په څنګ کې ولیدل، د هغوی په نیمایي لیدنو کې د کشمیر وروستی پرمختګ ذکر شو، چې هند یې نیمه خپلواکي ختمه کړه.

د امریکې ولسمشر ډانلډ ټرمپ په جولای میاشت کې د پاکستان له وزیراعظم عمران خان سره د لیدو په وخت وړاندیز وکړ، چې کولای شي د کشمیر پر شخړه د دواړو هېوادونو تر منځ منځګړتوب وکړي او په وروستیو ورځو کې یې د ملګرو ملتونو په غونډه کې هم دا وړاندیز بیا تکرار کړ.

پاکستان نه یواځې د اګست پر 5مه د کشمیر د ځانګړي حیثیت د ختمولو په اړه د هند د حکومت غندنه کړې، بلکې وزیراعظم عمران خان د ملګرو ملتونو په غونډه کې تور ولګاوه چې هند تر خپله ولکه لاندې کشمیر کې پر خلکو ظلمونه کوي او له اوږدې مودې یې ګرځبندیز لګولی دی.

XS
SM
MD
LG